COVID-19 UPDATE Supermarkets, groceries gialerto

CEBU, Philippines — Gipatawag ni Cebu City Councilor Joel Garganera, Deputy Chief Implementer for Inter-Agency Task Force Emergency Operations Center Cebu City ang dul-an 40 ka mga representante sa mga supermarkets ug grocery stores sa siyudad aron sila paandamon karon nga holiday season ug gilauman nga mosugwak ang mga mamalit bisan pa og naa pa ang pandemiya sa Covid-19.

Hinoon gipahibalo ni Garganera nga base sa data sa EOC menus ra kaayo ang natalang mga kaso sa virus nga mibisita sa grocery stores ug supermarkets.

Nagpakita pa matod kini nga ang mga grocery stores ug supermarkets nihimo sa ilang trabaho aron mapakgang ang pagkatap sa maong sakit.

Sa ilang gipadangat ni Garganera nga gawas sa pag-obserbar sa mga ilang mga kustomer sa health protocols responsibilidad sab sa management ang proteksyon sa ilang mga empleyado.

Kun dunay mga empleyado nga nagpakita og sintomas sa COVID-19 kinahanglan dayon kini aksyunan, di una patrabahuon ug ipaubos sa swab testing.

Sa pikas bahin, 172 nalang ang active cases sa coronavirus disease sa Cebu City base sa datos nga gipagawas sa Department of Health Central Visayas niadtong adlaw’ng Miyerkules.

Ang Cebu City dunay 10,724 total cases sa COVID-19 human nga nakatala og lima ka bag-ong kaso apan 9,864 recoveries niini ang nangaayo human nadugangan og tulo ug nagpabiling 688 ang nakalas.

Ang Mandaue City dunay 23 active cases sa COVID-19 gikan sa ilang 2,681 nga kinatibuk-ang kaso apan 2,487 nangaayo na samtang 171 ang nakalas.

Samtang ang Lapu-Lapu City dunay 45 aktibong kaso gikan sa 2,639 apan

2,485 niini ang naayo na ug 109 ang namatay.

Sa datos sa DOH-7 ang Central Visayas miabot na og 24,572 ang kaso sa rehiyon, 666 niini ang aktibong kaso; 22,498 ang nangaayo ug 1,408 ang nangamatay. ( BANAT NEWS)