Mga binilanggo sa Mandaue City Jail gipaubos sa drug test

CEBU, Philippines — Gipaubos sa random drug test ang 133 ka mga person deprived of liberty   (PDL) sa Mandaue City Jail niadtong Lunes Nobiyembre 16, 2020.

Ang maong gidaghanon gilangkuban sa 50 ka mga babaye nga binilanggo sa female ward ug 83 sa mga binilanggo nga lalaki nga pulos nagnegatibo sa migawas nga resulta.

Ang mga sakop sa City Anti -Drug Abuse Council (CADAC) sa Dakbayan sa Mandaue maoy nagpasiugda sa random drug testing sa mga binilanggo.

Si Jail  Superintendent  Jial Inopia nga maoy jail warden sa Mandaue City Jial nagpasalamat  sa kagamhanan sa Dakbayan  sa Mandaue sa gihatag nga suporta ngadto kanila.

"Dili tanan facility maka-conduct og drug test regularly." nagkanayon si Inopia.

Matud pa ni Inopia nga anaa sa 1,600 ang kinatibuk-ang gidaghanon sa binilanggo nga mga lalaki sa Mandaue City Jail ug 115 usab ang mga babaye.

Gitataw   niya nga gawas nga drug free ang Mandaue City Jail, nagpabilin usab kini nga COVID-19 free.

Samtang miabot ngadto sa 1500 ka mga indibidwal ang naka- enrol sa community based-drug rehab programs nga nagikan sa 30 ka mga barangay sa Dakbayan sa Sugbo.

Suma pa sa hepe sa Cebu City Office of Substance Abuse Prevention (COSAP) nga si Jonah John Rodriguez nga unom ka buwan ang rehabilitasyon kun diin sa ilang mga barangay mismo ipahigayon ang nagkadaiyang seminar o session.

Dugang pa ni Rodriguez nga pipila sa ilang mga kliyente mga drug surrenderees nga nagikan sa listahan sa Philippine National Police ug Philippine Drug Enforcement Agency.

Matud pa niya nga dunay mga lig-ong recovery coaches ang COSAP aron pag-abag sa mga tawo nga mag-usab sa ilang kinabuhi.

Ang maong programa tipik sa proyekto sa COSAP nga gitawag og AGAK o Atong Giyahan Alang sa Kausaban.

Pagkakaron dunay 988 ka persons deprived of liberty (PDLs) ang gipaubos sa rehab program sa COSAP.

Gawas sa maong programa, busy usab ang maong buhatan sa mga sorpresang drug test sa nagkadaiyang barangay sa Siyudad sa Sugbo ingon man usab sa mga buhatan sa Cebu City Hall. —Sanden J. Anadia /MEL (BANATNEWS)