Kapin sa P2.2 milyones nga drugas nasakmit sa managlahing operasyon

CEBU, Philippines — Kapin sa 2.2 milyones pesos nga balor sa illegal nga drugas ang nasakmit sa buy-bust operation sa Drug Enforcement Unit sa Labangon Police Station diha sa Sitio Sambagan A. Lopez Barangay Labangon, Dakbayan sa Sugbo, niadtong Martes sa kadlawon.

Ang dinakpan giila nga mao si Jelou Bongi Dullano 27 anyos, nag puyo sa Sitio Magayahay, Barangay Calamba ug nakuha gikan sa iyang posisyon ang 325 gramos nga gituhuang shabu.

Si PCPT. Jonathan Dela Cerna ang nangulo sa operasyon miingon nga gikonsiderar nga high value individual HVI Regional Level si Dullano og anaa kini sa drug watchlist sa kapolisan.

Samtang tulo ang nasikop atol usab sa operasyon sa Sawang Calero Police Station, Martes sa gabii diha sa may dalan Tres de Abril, Barangay Pahina San Nicolas ning Dakbayan sa Sugbo.  Ang nasikop naila nga sila si Christopher Cabaron, 25 anyos, usa ka e-bike driver, taga Barangay Suba ug mga customer niini nga sila si Manuelito Lubdose, 24anyos, ug Bryan Mahinay, 33anyos.

Nasakmit gikan sa ilang posisyon ang mga pinutos sa ginadili nga drugas nga mobalor ug dul-an sa 40 mil, samtang si Cabaron nakuhaan usab ug 22 revolver nga armas nga adunay tulo ka buhing bala. Ang mga dinakpan gitanggong na sa bilangguan samtang gipaabot nga pasakaan og tukmang kaso. — Rowena D. Capistrano/MEL (BANATNEWS)