Libreng facemask gipanghatag sa kapolisan sa Minglanilla

CEBU, Philippines — Libreng facemask ang gipanghatag sa kapulisan sa Lungsod sa Minglanilla kagahapong adlawa.

Si Police Major William Homoc, pangu sa kapulisan sa maong lungsod maoy nangulo niini sa paglibot sa kabarangayan.

Si Homoc nagkanayon nga kadtong lisod gyud nga makapalit og facemask maoy ila gitagaan og prayoridad niining ilang pagpanghatag og facemask.

Ang Lungsod sa Minglanilla gipaubos sa modified general community quarantine (MGCQ) busa aduna nay gipangtugotan nga mga tindahan nga makaabli ug ubang kalihukan.  Apan gipahinumdoman ni Homoc ang tanan nga dili rason ang kalisod nga dili nalang gyud ta motuman sa health protocols tungod kay alang ra kini sa kaayohan sa tanan.

Niadtong miaging semana, miabot sa kapin sa 100 ka tawo ang ilang nadakpan human nakalapas sa health protocols nga padayon nila nga gipatuman.

Samtang sa laing kalambuan, ibalik na sa City Veterinarian Office (CVO) ang serbisyo alang sa mga hayopan sa nagkalain-laing barangay sa Dakbayan sa Talisay karong sunod buwan. Kini maoy gipahibawo ni Dr. Mary Thessa Lorraine Alo, pangu sa CVO.

Matud pa ni Alo nga naputol ang ilang pagbisita sa kabarangayan human niigo ang pandemya ug gidid-an una ang pagpahigayon og mga kalihukan nga makapatapok sa katawhan.

 Nagkanayon si Alo nga naandan nila nga mosuroy sa kabarangayan aron mapaduol ang serbisyo ngadto sa mga konstituwenti nga mahiligon og mananap.

Karong Septembre 28, dunay himoong kalihukan may labot sa kasaulogan sa anti-rabies month nga pagasugdan sa alas 9 sa buntag hangtud sa alas 3 sa hapon diha sa Poblacion.

Giklaro hinuon ni Alo nga pag-bakuna lang una nga serbisyo ang ilang mahatag sa pagkakaron ug makapahimulos niini dili lang ang taga Poblacion kundili ang tanang Talisaynon. /MEL (BANATNEWS)