Labella: Health protocols sa CSBT kinahanglang hugot nga sundon
CEBU, Philippines — Gipakigtagbuan ni Cebu City Mayor Edgardo Labella ang mga representante sa Land Transportation Franchising and Regulatory Board(LTFRB)-7, Cebu City Police Office(CCPO), Talisay City Government, Cebu Provincial Government ug uban pa ug gituki ang pagbalik sa operasyon sa Cebu South Bus Terminal(CBST) nga naa nahimutang sa siyudad sa Sugbo.
Matud ni Labella tungod kay dunay pandemiya siguraduhon nga matuman gyud ang minimum health protocols gikan sa LTFRB ug Department of Health Central Visayas. Gipanglantawan ni Labella nga modagsa gyud ang mga tawo sa CSBT, kadtong molarga ug kadtong mangabot.
“Ato gayud nga gi-meeting para atong ma-monitor ug atong matun-an kun unsay mga protocols nga atong obserbahan ilabi na sa mga sakyanan nga moabot,” ni Labella pa.
Gihimug-atan sab ni Labella ang curfew hours nga gipatuman sa siyudad nga magsugod sa alas-10 sa gabii hangtod sa alas- 5 sa buntag ug kini makaapektar sa operasyon CSBT. Apil sab sa gituki ang designated bus stops aron malikayan ang traffic congestion sa kadalanan paingon sa terminal.
Kalabot sa maong balita, tungod sa pandemiya niubos ang kita sa CSBT karong bag-ohay pa kining nibalik Natalio Bacalso Avenue. Matud ni Carmem Quijano ang manager sa CSBT nga gikan sa P200 mil nga kita sa normal nga operasyon sa terminal matag adlaw sa wala pa ang pandemiya, anaa na lang sa P40 mil ngadto sa P50 mil kada adlaw ang ilang nakolekta gikan sa parking fee, CR fee, tubig ug kuryente sa unang pagbalik sa operasyon
"Unya dunay ginagmay sa rental kay amo man gipabayad gud ni katong month of March, sa tubig ug suga naa may ubang tawo nga wala kabayad atong paninglan. Before you can start here magsugod og trabaho, pagsugod ninyo og operation pay your obligations," matud ni Quijano. Hinoon kagahapong adlawa niabot ang kita sa CSBT og P75 mil ug nanghinaot si Quijano mosaka pa kini sa mga mosunod nga adlaw.
Kalabot sa curfew, si Quijano miingon nga mosunod sila niini ug sa tanang protocols sa siyudad.
"Sayo kaayo mamauli, mga 6oclock to 7oclock wala nay tawo diri," matud ni Quijano. Le Phyllis F. Antojado/IBM (BANATNEWS)
- Latest
