Drayber, panday sikop sa buy-bust

CEBU, Philippines — Nadakpan ang duha ka pusher og shabu sa managlahing buy-bust operation sa kapolisan sa Presinto 5 sa Lapu-Lapu City Police Office alas 10 pasado sa niaging gabii.

Si Police Captain Airbert Jay Samson, hepe sa Presinto 5 sa LLCPO, niila sa dinakpan nga si Serlito Narvasa alyas Charlie, 34, usa ka tricycle driver nga taga Sitio Magtinabangay, Mohon 2, Barangay Tisa, Dakbayan sa Sugbo.

Matud ni Samson nga nakadawat sila og mga taho labot sa ilegal nga kalihukan sa dinakpan sa Sitio Chamba, Barangay Pusok, Dakbayan sa Lapu-Lapu hinungdan nga ilang gihimo ang buy-bust operation.

Nakuha gikan sa dinakpan ang mokabat sa P9,316 nga shabu ug boodle money.

Sa Sitio Ihawan, Barangay Pusok nadakpan sab ang pusher nga si Lorenzo Alingasa Jr., 36, usa ka construction worker nga nagpuyo sa maong lugar.

Ang dinakpan nakuhaan og mokabat sa P9,520 nga kantidad sa shabu ug P1,500 nga buy-bust money ug P400 nga gituohang halin niini.

Samtang usa ka 59-anyos nga nalakip sa Top 10 Bohol Province Target List ang nasikop sa hiniusang operasyon sa mga tinugyanan sa PDEA-Bohol Provincial Office, PIU-BPPO, Clarin Police Station, RDEU-7 ug Bohol Maritime Police Office sa may Barangay Nahawan, Clarin, Bohol, alas 8 pasado sa sa buntag kagahapon.

Ang nasikop naila nga si Romeo Sanchez, ulitawo, walay trabaho ug residente sa maong lugar.

Nasakmit sa maong dinakpan ang siyam ka putos sa ginadili nga drugas nga balor og P47,600, buy-bust money ug uban pa.

Matud ni Kitkat Fortaleza, kasamtangan nga public information officer sa PDEA-7, nga ang dinakpan nag-operate sa Lungsod sa Clarin ug silingan nga mga lugar ug giingong makabaligya og 20 gramos matag semana. — Rowena D. Capistrano/GMR (BANATNEWS)