Labella mobalik na og trabaho sa Lunes

CEBU, Philippines — Nalandig sa tambalanan si Mayor Edgardo Labella sa Dakbayan sa Sugbo tungod sa bato sa iyang apdo ug napailawom kini sa operasyon.

Si Atty, Rey Gealon tigpama sa siyudad nagkanayon nga malamposon ang operasyon ni Labella.

Sayo pa, si Labella ni-post kini diha sa iyang facebook page nga wala niya panumbalinga ang gipamati niyang sakit sa tiyan ug lutahan tungod sa kadaghanan sa iyang gimbuhaton ilabi na ang pagpakigbatok sa COVID-19.

Human mopaubos sa medical checkup nasuta nga si Labella aduna kini bato sa iyang apdo. Kagahapon sa alas 10:00 sa buntag gipaubos sa operasyon si Labella ug pagkahuman sa nahisgutang operasyon gidala kini sa recovery room aron adto magpaayo. Kagahapon usab ni-file sa iyahang official leave si Labella aron makapahulay hinungdan nga si Vice Mayor Michael Rama maoy acting mayor karon.

Gikatakda nga sa Lunes sa sunod semana mobalik na si Labella sa iyang trabaho diha sa Cebu City Hall.

“Ang mayor nanghinaot nga sa gihapon magpabilin ang mga kalihukan ug operasyon dinhi sa atong kagamhanang lokal sa Sugbo ang mga departamento kanunay nga gahatag og serbisyo sa mga Sugbuanon nga buot mokuha sa mga serbisyo niini”, Dugang ni Gealon. /BDB (BANATNEWS)