CCQC sirad-an kay palamboon

CEBU, Philippines — Gipahibalo ni Cebu City Mayor Edgardo Labella nga sirad-an makadiyot ang Cebu City Quarantine Center aron palamboon ug i-upgrade ngadto na sa hospital level aron makaatiman og level 2 COVID-19 patients.

Ang CCQC gidesinyo lang para sa level 1 COVID-19 nga mga pasyente o kadtong positibo nga dunay gipamati nga mild to moderate nga mga sintomas.

Ang CCQC usa ka negative pressure building nga haom alang sa pag-atiman sa mga pasyenteng dunay COVID-19 virus.

“Maong karon, atong gisira og pipila ka adlaw para butangan mga laing ekipo. Mamahimong level-2 Hospital ang level unya ang CCQC,” matud ni Labella.

Matud pang Yvonne Cania sa Cebu City Memorial Medical Center gitinguha nilang ma-upgrade ang pasilidad karong buwana.

Ang pag-upgrade niini natunong sab nga nimenus og maayo ang gidaghanon sa mga bag-ong natakboyan sa maong sakit.

Gani ang mga barangay isolation centers sa siyudad nga butanganan sa mga asymptomatic nga positibo sa COVID-19 gitipo-tipo nalang o gi-clusterized tungod kay gamay nalang ang gipangdala didto.

Bisan paman nga hasta mga pribadong tambalanan nagpadayon sa pagdugang sa ilang COVID-19 beds, si Labella miingon nga dili niya paabutong maparehas ang Cebu City sa nahitabo karon didto sa Metro Manila nga diin naghinobra ang gidaghanon sa mga pasyente sa gipreparar nga mga pasilidad para sa COVID-19 patients.

“Para di ma-overwhelmed atong mga hospitals. Gani atong makita ang Manila, overwhelmed sila didto. Kita, we are so prepared, ato mga isolation centers nga 30 to 40 percent ra man gani. In my last conversations with hospital administrators, 40 to 50 percent ra ang ilang occupancy kay nagdugang man sila. But of course, maayo nang nanobra kay we can never tell,” dugang pagpasabot sa mayor.

Sa wala pa mapuno  ang mga tambalanan didto sa National Capital Region (NCR), ang mga publiko ug pribadong tambalanan sa siyudad sa Sugbo nangapuno sab sa mga kaso sa COVID-19, mao nga nahimo ang siyudad nga epicenter sa pandemiya ug gipadala dinhi ang grupo ni Sec. Roy Cimatu ug nitutok ang Inter-Agency Task Force niadtong Hunyo.

Si Labella miingon nga gawas sa palamboon ang CCQC, padugangan sab niya kini og mga higdaanan diha sa gitrabahong extension ilabi na nga nagkadaghan sab ang mga kaso didto sa mga silingang lungsod sa siyudad.

“The Province, other parts of the island of Cebu kay ari man pud dagan gihapon sa Cebu City.  Di mahimo nga ang ato  rang pangandaman igo ra sa Cebu City. We can’t say no if there are Covid patients from the other island of Cebu and even gani from other neighboring provinces, maong mag-andam ta,” si Labella miingon.

Sa pagkakaron, gitrabaho na sab ang Covid-19 dialysis center diha gihapon sa CCQC, dugang kini sa dialysis center nga naa sa SM Seaside City nga para sa mga walay COVID-19 nga mga pasyente.

Ang CCQC gitaganahan sa Konseho sa siyudad og P100 million nga matud pang Labella P58 million palang ang nagamit.

Samtang gipalambo pa ang CCQC, ang mga pasyenteng dunay sintomas nga mild to moderate adto dad-on sa Bayanihan Field Center sa Sacred Heart School for Boys nga gidumala sa DOH ug sa NOAH Complex  para sa mga asymptomatic patients  gawas pa sa  mga Barangay Isolation Centers. /IBM (BANATNEWS)