Kaluha nakuhaan og drugas sa checkpoint

CEBU, Philippines — Nasikop ang kaluha human nakuhaan og balor P43,180 nga ilegal nga drugas sa border control checkpoint sa Bulacao, Dakbayan sa Talisay niadtong Martes sa gabii.

Ang mga nadakpan mao sila si Judel Loun Sostino, ug si Jonel Loun Sostino, parehong 21-anyos nga nagpuyo sa Upper Pakigne, Minglanilla.

Gisita ang duha sa kapolisan gumikan sa wala pagsuot og face mask ingon man walay quarantine pass ug nanagan hinungdan nga gigukod hangtud nga nasikop.

Dihang girekisa nakuhaan kini og ilegal nga drugas hinungdan nga napun-an ang ilang kaso.

Samtang duha sab ka tawo ang nasikop sa kapolisan sa Sitio Apid, Cantabaco, Toledo City niadtong Martes sa gabii.

Ang mga nasikop mao sila si Alfanter Paner alyas Mikmik, 46, high-value individual, heavy equipment mechanic, ug kapuyo niini nga si Gezella Layague, 37, pulos residente sa maong lugar

Nasakmit gikan sa mga dinakpan ang shabu nga balor og P170 mil, drug paraphernalia, usa ka unit sa KG9 sub machine gun ug 300 kabuok butane canisters. Rowena D. Capistrano/GMR (BANATNEWS)