Dili motuman sa schedule sikopon sa Talisay

CEBU, Philippines — Ang mga tawo kinsa moanha sa merkado sa Tabunok o sa mga mall sa Dakbayan sa Talisay aron mangompra bisan dili sa ilang schedule nga adlaw pangsikopon na kini.

Kini maoy gipahibawo ni Police Major Gerard Ace Pelare, hepe  sa Talisay City Police Station.

Ang kapolisan ug mga kapitan sa kabarangayan sa siyudad nagpahigayon kini og tigom ug mao kini ang ilang nauyonan.

Ilaha kining himuon aron ang katawhan magpundo sa ilang mga balay ug dili makasuroy-suroy nga magpasumangil lang og pangompra sa ilang panginahanglanon.

Tumong niini nga mo menos ang mga tawo nga manggawas ug kapugngan ang pagkuyanap sa makamatay nga        virus.

Samtang si Mayor Gerald Anthony “Samsam” Gullas Jr. niawhag sa katawhan nga mohimo usab kini og mga lakang aron malikay sa covid-19.

Si Gullas nanghinaot nga ang mga Talisaynon motuman kini sa schedule sa adlaw sa ilang pagpangompra ug dili kini maggawas-gawas sa ilang panimalay kong dili pa ang gikatakda nila nga schedule nga mogawas.

Sa adlaw nga Lunes ug Huwebes, ang mga residente sa Barangay Poblacion, Cansojong, Lagtang, San Isidro, Tabunok, Lawaan 2 ug Mohon mao ang mahimo nga makapangompra.

Sa adlaw nga Martes ug Biyernes ang mga residente sa Barangay Jaclupan, Manipis, Campo 4, Tanke, Dumlog, Maghaway, Tapul ug San Roque ang tugotan nga makapangompra.

Samtang sa adlaw nga Miyerkules ug Sabado ang Barangay Pooc, Biasong, Lawaan 3, Lawaan 1, Bulacao, Candulawan ug Linao ang makapangompra. /BDB (BANATNEWS)