133 na ang naayo sa COVID-19 sa probinsya

CEBU, Philippines — Nagpabilin sa 269 ang active cases sa Probinsya sa Sugbo gikan sa 440 nga kinatibuk-ang kaso sa coronavirus disease (COVID-19) sa lalawigan sumala pa ni Gob. Gwendolyn Garcia.

Base sa datos sa Hunyo 16 anaa sa 57 ang na-admit sa tambalanan ug 39 ang anaa sa home isolation. Nidaghan usab ang nakarecover gikan sa 120 nahimo na karon nga 133. Ang asymptomatic o walay sintomas nisaka sa 173 gikan sa 146.

Sa maong mga kaso, matud ni Garcia 368 ang mga residente sa Probinsya sa Sugbo samtang 19 ang temporaryong gapuyo sa Dakbayan sa Sugbo.

Ang mga pasyente nga namatay 38 apan unom (6) ra niini ang namatay tungod sa maong sakit samtang 31 ang COVID-19 incidental nga nagpasabot aduna na silang daang sakit nga gihambin ug natakboyan sa virus, samtang dunay usa ka kaso nga wala pay diagnosis.

Matud ni Garcia, nga sa mga namatay walo niini ang adunay heart disease, pito ang community acquired pneumonia, unom ang kidney disease, duha ang cancer, tulo ang cardiovascular stroke ug uban pang sakit.

Sa Barangay Casay sa Lungsod sa Dalaguete nakatala sila og kompirmadong positibo sa Covid-19  nga residente sa Sitio Fatima. Giingon nga dialysis patient kini nga anaa karon sa Vicente Sotto Memorial Medical Hospital kauban ang asawa niini nga gipaubos na usab sa swab testing.

Samtang pito ka tawong positibo sa COVID-19 sa Dakbayan sa Talisay ang nangaayo na sumala pa ni Mayor Gerald Anthony “Samsam” Gullas Jr. kagahapon sa buntag.

Si Gullas miingon nga mosunod kini sa rekomendasyon sa task force karon nga gisaka ngadto sa modified ECQ ang siyudad.

Sa pinakauwahing natala, 59 ang aktibong kaso sa COVID-19 sa dakbayan, 43 ang nakarekuber na samtang 16 ang nitaliwan na.

Nihangyo si Gullas nga hugot nga sundon ang mga protokol nga gipatuman. Rowena D. Capistrano, Gabriel Bonjoc/IBM (BANATNEWS)