Nangambus sa polis, lima nadakpan

CEBU, Philippines — Lima ka gituohang mga suspetsado sa ambush nga nakaangol sa us aka pulis sa bukirang barangay sa Dakbayan sa Toledo,nasikop sa mga operatiba  sa 2nd Provincial Mobile Force Company niadtong Sabado sa gabii sa Sitio Kalogtokan, Barangay Pangamihan sa maong dakbayan.

Ang mga suspek giila nga sila Eduardo Alisoso Cabiles Jr, Anecito Ordinisa Alisoso, Diovenal Alisoso Cabiles, Ian Alisoso Cabiles, ug Regie Bitor Cabiles nakuhaan og mga armas, bala, granada, ug usa ka kilong marijuana nga nagkantidad og P12,000.

Mag-atubang sila sa mga kaso nga Frustrated Murder ug Marijuana Cultivation nga gikatakda sa pagsang-at karong Lunes.

“Kato sila, grupo gyud to sila sa mga planters ug marijuana didto nga lugar,” si Police Major Dave Mahilum sa PMFC miingon.

Si Cabiles, usa sa naaresto  maoy gitumbok nga lider sa grupo nga dugay na nga nananom og marijuana. Duna kini warrant of arrest niadto pang 2017 nigawas.

Tungod sa kooperasyon sa komunidad sa palibot sa lugar, nakit-an sa mga awtoridad ang ilang lokasyon ug gipahigayon ang pagdakup.

Ang lugar kung diin gatago ang mga suspek, gihulagway nga delikado ang agianan ug hilit kaayo.

“Nung dumating na kami sa area ay may nahuli lang kami na isa nagsi-surrenderan na yung iba, isa-isa silang lumabas at nag surrender,” sigun pa ni Mahilum.

Ang mga suspetsado giingong miangkong sila maoy nananom sa mga marijuana sa lugar ug usa nila maoy nakapusil sa polis.

Ang nasamdan nga pulis giila nga si Police Master Sergeant Douglas Maravillas nga taga-Asturias nga sakop sa 1st PMFC. /IBM (BANATNEWS)