5 Seaman positibo sa COVID-19

CEBU, Philippines — Napun-an og 37 ka mga bag-ong kompirmadong nataptan sa coronavirus disease (COVID-19) ang Sugbo kagahapong adlawa, diin 30 niini sa Cebu City ug ang pito lukop Probinsya sa Sugbo apil na ang lima ka mga seaman nga kauban sa 185 ka Overseas Filipino Workers nga naabot niadtong adlaw nga Lunes.

Matud ni Gob. Gwendolyn Garcia, ang lima ka OFWS gikan sa Lourdes Barangay Poblacion, Liloan;  Barangay Maya, Daanbantayan; Brgy. Looc, Danao City, Brgy. Sac-sac, Consolacion ug Brgy. Colon, City of Naga.

Hinuon, ang maong mga OFWs anaa pa gihapon naka check-in sa mga hotels sa Dakbayan sa Sugbo ug gi-kwarantina sulod sa 14 ka adlaw.

Kasohan

Sa Talisay, usa ka 33-anyos nga babaye nga taga Laray,  Barangay San Roque ang bag-ong kaso sa COVID-19, sumala ni Talisay City Mayor Gerard Anthony “Samsam” Gullas.

Gani pasakaan og kaso ni Gullas ang maong pasyente nga gitawag lang nya nga “Patient Talisay 2 or PT2” kay nakalapas kini sa quarantine protocol.

Sa iyang Facebook page, si Gullas nagkanayon nga ang maong babaye uban sa tulo pa kapamilya niini ang gi swab test apan siya ra ang positibo. Apan aron makasiguro silang talang gi-isolate karon.

Matud ni Gullas nga ang kaso karon sa Talisay adunay koneksyon sa nagpositibo sa Barangay Inayawan sa Dakbayan sa Sugbo human giingong nibisita si PT2 niadtong Abril 18 sa maong barangay.

“… She visited individuals of the positive case in Brgy. Inayawan, It was announced April 21 and 22 that these individuals were positive of the coronavirus,” matud ni Gullas.

Nibisita

Si Garcia nga ang maong babaye magbisitahan sa iyang amahan sa Inayawan.  Niadtong Abril 28 o pito (7) ka adlaw human nigawas ang resulta didto sa Inayawan, una pa nitawag si PT2 sa COVID Hotline ug ni-report sa koneksyon niya sa mga nagpositibo sa Inayawan ug gani aduna kini gipamati sama sa ubo.

Apan nasayran usab ni Gullas nga naglakawlakaw pa ang maong pasyente.

“During the investigation it was also learned that naglakaw2x pa ni cya pag April 25. Even visiting places such as the brgy. hall among others. Tanods and officials that met her would be prioritized for swabbing and testing,” matud ni Gullas.

Ang wala pagpahibalo dayon ni PT2 matod ni Gullas maoy nakapalisod kanila sa contract tracing.

“Katong panahona, PT2 never mentioned any details about her connection with the Brgy. Inayawan cases causing danger to others. Mao nani ang problema karon,” dugang ni Gullas kinsa nasagmuyo sa nahitabo.

Human sa pagpahibalo ni PT2  niadtong Abril 28, gikuha ug gi-isolate kini dayon. Giapil usab og swab ang iyang tulo ka pamilya apan sila negatibo.

Gi-lockdown na usab ang Barangay San Roque.

Minglanilla

Samtang sa Lungsod sa Minglanilla, usa ka 31-anyos nga babaye sa Barangay Linao ang ikatulong kaso sa COVID-19 sa maong lungsod.

Niadtong Abril 30, usa ka 15 anyos nga lalaki ang natala nga ikaduhang positibo sa maong lungsod nga taga Purok Estaca, Tunghaan.  Ang bata gimonitor na karon sa RHU sa Minglanilla human nagpakita kini og sintomas sa maong sakit.

Sumala pa sa Facebook page sa Minglanilla, nagtuo silang posibleng natakdan kini gikan sa gawas.  Giingong ang bayaw sa bata helper sa usa ka tigsuplay og oxygen sa mga tambalanan.

Ang maong bayaw sa bata niuli niadtong Abril 8 hangtod Abril 20. Niadtong Abril 24 nagsugod na og ubo ug bata ug dayon gihilantan niadtong Abril 25.

Gi-isolate na ang bata ug nag contract tracing na usab ang LGU. Gi-lockdown na usab ang Purok Estaca lakip na ang Maria Uno ug Dos sa Lower Tunghaan.

Cebu City

Miabot na og 760 ang kaso sa coronavirus disease (COVID-19) dinhi sa Siyudad sa Sugbo human laing 30 ka kumpirmadong kaso ang nadugang base sa datos gikan sa Cebu City Health Department.

Ang bag-ong kumpirmadong kaso natala:  duha sa Sitio Baca ug PC Hills sa Barangay Apas;  usa ka kaso sa Tanguli sa Barangay Busay; duha sa Nivel Hills ug Sunset  Drive sa Barangay Lahug; duha sa Tres de Abril sa Barangay Punta Princesa;  usa sa Barangay Bulacao-Pardo; upat sa Sitio Tinabangay, Alaska sa Barangay Mambaling;  duha sa Barangay Suba; pito sa Barangay Luz , upat niini sa Sitio Sto. Niño ug tulo Sitio San Vicente.

Samtang  usa sab sa Sitio Calumpang sa Barangay Inayawan;  usa sa Nasipit sa Barangay Talamban; upat sa Sitio Cabajar sa Barangay Guadalupe;  usa sa Juana Osmeña sa Barangay Camputhaw; usa sa Sitio Negative sa Barangay Carreta ug usa sa Bureau of Jail Management and Penology(BJMP).

Sa talaan sa City Health Department pito na ang patay sa Cebu City gumikan niining COVID-19. Decemay P. Padilla/IBM (BANATNEWS)