Wanted nga durugista nisukol napatay sa polis

CEBU, Philippines — Patay ang usa ka gipasanginlang notadong tigpayuhot og ilegal nga drugas human misukol sa mga sakop sa Provincial Intelligence Branch (PIB) sa Cebu Provincial Police Office atol sa buy bust operation sa Sitio Riverside, Lower Lipata, Barangay Linao, lungsod sa Minglanilla niadtong Huwebes sa gabii.

Ang napatay mao si Emiliano Sanggutan Ranghos alyas Teting nga giingong usa ka High Value Individual (HVI) sa kampanya batok ilegal nga drugas sa probinsya.

Nadakpan sab ang kauban niini nga si Roger Tabalado Gerondalan, 45, usa ka construction worker nga nagpuyo sa maong dapit.

Matud pa ni Police Lt. Colonel Marlu Conag, pangu sa PIB, subject sa operasyon si Ranghos apan nakabantay kini dayon nga polis ang nipalit kaniya og drugas ug giunhan kini sa pagpusil apan walay nangaigo ug maoy napatay sa pagbawos sa mga polis.

Nakuhaan siya og ilegal nga drugas nga mitimbang 102 gramos nga adunay bana-bana nga balor P102 mil.

Nakuha diha sa crime scene usa ka .45 nga armas nga adunay upat ka bala, usa ka .38 revolver nga adunay usa ka bala ug duha nga wala makabuto, drug paraphernalia, lima ka basiyo, usa ka metal jacket ug usa ka deformed slug.

Sumala pang Conag nga adunay pending nga warrant of arrest si Ranghos sa sala ni Judge Glenda Go sa Regional Trial Court (RTC) branch 65 sa Dakbayan sa Talisay. /IBM (BANATNEWS)