Lima nagpaburot sa presyo na-entrapped

CEBU, Philippines — Lima ka mga lalaki ang gidakop sa managhaling operasyon sa mga sakop sa National Bureau of Investigation Central Visayas ug Criminal Investigation and Detection Group uban sa Lapu-Lapu City Police Office kagahapong adlawa nunot sa pagpamaligya og overpriced nga gadgets ug alcohol nga galamiton kaayo aron batok sa novel coronavirus (COVID19).

Sa operasyon sa NBI-CV, nasikop sa managlahing entrapment operations sila si Jeremy Caño nga taga Brgy. Kinasang-an ug Joer Ardo sa Banawa sa Barangay Guadalupe sa Dakbayan sa Sugbo. Matud ni Atty. Wenceslao Galdenez, nakadawat sila’g impormasyon niadtong Miyerkules gikan sa usa ka reklamante kalabot sa mahal nga presyo sa thermal scanner nga gibaligya ni Ardo kinsa maoy ilang giuna pagsikop sa Banawa.

Nakuha gikan kang Ardo ang upat ka thermal scanners nga gialegar nga gibaligya niini sa presyo nga tag 5,900 nga unta ang presyo sa merkado tag P3,900 ra.

Apan si Ardo giingong mirason nga mahal ang iyang baligya sa thermal scanners tungod kay mahal ang pagpalit niini gikan sa iyang supplier nga si Caño nga giingong usa ka wholesaler sa mga medical supply.

Si Caño maoy gisunod og rumbo sa NBI nga niresulta sab sa pagkasikop kaniya ug nakuhaan og lain pang lima ka thermal scanners sa panimalay niini sa Barangay Kinasang-an nga nagsilbi sab butanganan niya og stocks sa mga dinaliang medical supplies.

Sa kinatibuk-an mobalor ngadto sa P53,991 ang thermal scanners base sa ilang presyo apan P35,911 lang unta base sa Suggested Retailed Price sa Department of Trade and Industry (DTI). Overpriced alcohol

Samtang nadakpan sab sa joint operation sa Lapu Lapu City Police Office (LLCPO) ug Criminal Investigation and Detection Group (CIDG) Lapu Lapu City Field Unit diha sa parking lot sa usa ka mall sa Dakbayan sa Lapu-Lapu ang tulo ka mga lalaking gialegar nga nagbaligya og overpriced nga alcohol.

Giila ang mga dinakpan nga sila Jose Condevillamar 57, taga Dakbayan sa Talisay, Rex Marco Roble,38, taga Barangay Bulacao sa Dakbayan sa Sugbo ug Rupert Yballe ,31, taga Barangay Luz Dakbayan sa Sugbo.

Matud ni LLCPO Director Police Colonel Clarito Baja nga nakadawat sila og impormasyon kalabot sa pamaligya og alcohol nga gipaburot ang presyo itandi sa SRP sa DTI.

Giingon nga suppliers ang tulo anang mga namaligya online nga taga Dakbayan sa Mandaue ug Lapu-Lapu.

Gibutyag sab ni Baja human sa dul-an usa ka buwan nga surveillance uban ang CIDG LapuLapu Field Unit pinangulohan ni Police Major Lirio Coral ilang napahigayon ang buybust operation.

Nakuha gikan sa grupo ang 20 medium size container sa alcohol ug 23 large size container sa alcohol ug tulo ka 30% sanitizer nga mobalor ngadto sa P26 mil kun tag 500 matag duha ka litro.

Kasong kalapasan sa Republic Act 7581 kun Overprice Act ug RA 73941 kun Consumer Act ang atubangon sa lima. /IBM (BANATNEWS)