Clamping operation padayon

CEBU, Philippines — Dul-an sa 50 ka mga sakyanan ang na clamped sa mga tinugyan sa Cebu City Transportation Office human sa ilang gipahigayon nga operation Biyernes sa sayong kaadlawon sa may South District sa Dakbayan sa Sugbo.

Ang mga na clamp nga sakyanan gikan sa Maya Back Total Gas-5; Punay St-6; Pati St-4; Ubos Puso-5; Cabreros-1; Basak/Cabreros-2; Bontores Street- 2; Macopa St-1; Lemon St-11; Siloy St-7; Sal-ing St-2; Back Concord Basak-3.

Matud pa ni John Paul Amores ang Public Information Officer sa communications and electronics sa CCTO, nga nahinabi sa Banat News, ang mga tagiya sa maong mga sakyanan nakalapas sa Night illegal Parking, City Ordinance 2004.

Sumala pa ni Amores, gihawanan ang maong dapit kay duol kini sa St. Anthony Mother and Child Hospital sa may Cabreros ug aron dali ra usab makasulod kung adunay mga ambulansiya o emerhensya nga motumaw.

Dugang pa ni Amores, walay hunong ang clamping operation batok sa mga illegal nga namarking sa wala gitagana nga lugar aron dili maglisod kung adunay mga katalagman nga motumaw

Gitug-an ni Amores, mil kinyentos gihapon ang multa sa malapason kini kung walay laing pending nga bayronon. /IBM (BANATNEWS)