Kapin P1 milyon ang nasakmit subay sa Oplan Iwas Paputok

CEBU, Philippines — Mokabat ngadto sa P1.150 milyones nga balor sa mga illegal nga pabuto ang nasakmit sa kapulisan sa Police Regional Office 7 atol sa ilang hugot nga suporta sa kampanyang Oplan Iwas Paputok sa Department of Health ug sa Philippine National Police.

Kini maoy gibutyag ni PRO7 Deputy Regional Director for Administration Police Brigadier General Ildebrandi Usana subay sa gipahigayon nga lapad nga pag-inspeksyon sa mga tindahan tibuok Central Visayas.

Dugang pa ni Usana nga posibling mosaka pa ang gidaghanon sa mga nakuhang illegal nga pabuto sa tibuok rehiyon. Sanglit sa kapin usa ka milyon nga balor sa pabuto nga nakuha sa dakbayan sa Sugbo ug Dakbayan sa Lapu-Lapu lamang kini ug wala pa maihap ang lain pang probinsya sa Central Visayas.

Mipahimangno si Usana nga hugot nga seguridad ang gipatuman sa kapulisan sa tibuok Central Visayas nga walay mogamit sa armas sa pagpabuto.

Giawhag sab ni Usana kagahapon ang tanang gun owners nga responsable lang unta sila sa ilang mga armas kay kun kini mobuto adunay kinabuhing nameligro.

Samtang gimandoan usab ang mga police sa probinsya nga mag bantay labot sa posibleng pagatake sa mga rebelde bisan pa man nga adunay gipatuman nga ceasefire sa gobyerno. /IBM (BANATNEWS)