P6.5 milyones shabu, siyam ka HVT nasikop

CEBU, Philippines — Mokabat ngadto sa dul-an P6.5 milyones nga balor sa gidudahang shabu ang nasakmit sa managlahing anti-drug operations nga gilusad sa kapolisan sa Cebu City Police Office (CCPO) ug Cebu Provincial Police Office.

Ang unang operasyon gipahigayon sa City Intelligence Branch (CCPO-CIB) nga gipangulohan ni Police Major Randy Caballes sa Barangay Calamba Dakbayan sa Sugbo ug nadakpan ang usa ka Jennifer Jaca, 40, nagpuyo sa maong lugar nga gikonsiderar nga regional level high value target.

Matud ni Caballes nga si Jaca dili mobaligya og dili binulto, giingong 100 ngadto sa 200 gramos nga shabu matag semana ang mabaligya ni Jaca.

Mokabat ngadto sa 100 gramos nga mokantidad og P680 mil ang nasakmit nga gidudahang shabu gikan ni Jaca.

Sa laing operasyon nga gihimo Pardo Police Station diha sa Barangay Cogon Pardo, Dakbayan sa Sugbo ilang nadakpan si Niño Cabiso, 37, taga Sitio Tugas, Barangay Pardo.

Matud ni Pardo Police Station chief Police Major John Kareen Escober nga si Cabiso usa ka regional level high value target ug dinagko ang transaksyon niini.

Si Cabiso gikatahong nitug-an nga may tawo rang mokontak kaniya aron mokuha og supply sa mga silingan nga barangay sama sa Barangay Duljo Fatima, Pardo ug uban pa.

Moabot kapin tunga sa kilong shabu ( 521 gramos) ang nakuha gikan kaniya nga moabot P4.2 milyones base sa Dangerous Drugs Board value.

Samtang sa lain usab nga operasyon nga gihimo sa mga sakop sa Provincial Intelligence Branch sa CPPO diha sa Camagong St. Barangay Lahug, Biyernes sa gabii nasikop silang Aljen Villaflores, nga usa sab ka provincial HVT, 19 anyos; ug mga kaubang sila si Rosemarie Angcon, 40, ug Mariel Pugoy, 22, pulos nagpuyo sa maong lugar.

Nasakmit gikan sa mga dinakpan ang mga pinutos nga ginadiling drugas nga motimbang og 200 gramos nga mobalor ug P1,360,000.00; buy bust money ug sudlanan sa ginadili nga drugas.

Sa operasyon sab nga gihimo sa kapolisan sa Dakbayan sa Talisay, nadakpan diha sa Purok Malipayon-Sitio Mangga, Barangay Mohon, niadtong Biyernes sa hapon ang mga high value targets ug nakuha ang P1.3 milyon nga gituohang shabu.

Ang subject sa operasyon mao si Karlo Taboada Abbu, 29, taga 42 C Salvador St. Labangon, Cebu City.

Samtang ang mga kauban niini nga pulos sab HVTs nga nasikop mao sila si Edwin Villegas Saraosos, 47; Michelle Tapangan Mapalo, 34; ug si Gena Escoton Lumen, 31.

Ang mga dinakpan nakuhaan og pito ka medium packs, duha ka dako ug unom ka gagmay nga paketeng may sud nga gidudahang shabu nga moabot dul-an 200 gramos ug ingon man buy bust money.

Ang mga dinakpan gibalhog sa bilangguan nga gikatakdang pasakaan og kasong paglapas sa Section 5 sa Article II, sa Republic Act 9165 karong adlaw nga Lunes. /IBM (BANATNEWS)