Ginang gipusil sud sa tindahan

CEBU, Philippines – Patay ang usa ka 38-anyos nga ginang human gipusil sa wala mailhing mamumuno, kinsa nagpakaaron- ingnong kustomer sa tindahan niini sa may Purok 4, Barangay Lunas, Lungsod sa Asturias, Miyerkules sa gabie

Ang nakalas naila nga Analyn Empedad, adunay kapuyo ug residente sa maong lugar. Samtang ang mamumuno wala mailhi ug nagsakay og motor.

Matud pa ni Police Corporal Joe Fry Tapao, Desk Officer sa Asturias Police Station, base sa initial nga imbestigasyon naa sulod sa iyang sari-sari store ang biktima kuyog sa iyang mga pag-umangkon.

Kalit niabot ang usa ka motor ug ang sakay niini nagpakaaron- ingnong mopalit og sigarilyo apan wala man naninda og sigarilyo si Empedad ug giingnan ang lalaki nga adto lang sa laing tindahan mopalit.

Nilakaw ang mamumuno apan pipila ka gutlo nibalik kini ug gipusil ang biktima sa makadaghang higayon nga maoy naingnan sa hinanali niini nga kamatayon. Daling nisibat ang mamumuno sakay sa motor.

Blangko pa ang kapolisan sa motibo sa pagpatay kang Empedad apan wala nila gisalikway ang posibilidad sa personal nga bangi ug illegal nga drugas ilabi na nga dili pa dugay nasikop ang kapuyo niini tungod sa kalambigitan sa illegal nga drugas.

Unom  ka basiyo sa bala sa .9mm ang nakuha diha sa crime scene. (/IBM)(BANAT NEWS)