22 ka kawani sa CH gipatubag bahin sa drug test
CEBU, Philippines — Gipadad-an na og show cause notice ang 22 ka trabahante sa Cebu City Hall kinsa nagpositibo ug niangkon nga tiggamitan sa ginadiling drugas atol sa kinalit nga drug test sa Cebu City Office on Substance Abuse Prevention.
Ang City Legal Office ang nipadala sa show cause notices aron paghatag og higayon sa mga empleyado sa pagtubag sulod sa 24-oras kung nganong dili sila angay pahamtangan og silot human nasayran nga positibo sa ginadili nga drugas.
Matud ni City Legal Officer, Atty. Rey Gealon, nga ang pakyas sa pagsumiter sa written explanation maisip kini nga waiver sa iyang katungod nga mapaminaw.
Sumala pa ni Gealon nga base sa Civil Service Commission Resolution No. 1700653 niadtong Marso 15, 2017 nagbutyag nga ang drug test nagpabilin nga rekisitos sa mosulod og trabaho sa gobiyerno.
Gitug-an ni Gealon nga magpadayon sila sa ilang imbestigasyon subay sa kamanduan ni Mayor Edgardo Labella kinsa maoy nangamahan sa Compulsory Drug Test Ordinance dihang konsehal pa kini.
Ang City Ordinance No. 1829 nagmando sa tanang empleyado sa Cebu City Hall nga mopaubos sa compulsory drug testing isip kabahin sa pre-employment ug annual random drug check-ups.
Si Gealon nitug-an nga si Labella dili makatugot nga adunay mga adik nga trabahante ubos sa iyang administrasyon.
“The mayor cannot tolerate any drug addict under the employ of the city government in his administration,” matud ni Gealon.
Ang 22 ka kawani nga nagpositibo sa drug test mao ang lima gikan sa Market Operations Division; 10 sa Prevention, Restoration, Order, Beautification, and Enforcement Team; duha sa Department of General Services; duha sa Parks and Playground Commission; ug tag usa sa City Registrar’s Office ug Operation Second Chance.
Ang 21 nagpositibo sa methamphetamine hydrochloride o shabu ug ang usa positibo sa marijuana. GMR (BANATNEWS)
- Latest
