Nanigarilyo sa publiko ug nalambigit sa swertres sikop

CEBU, Philippines – Gidakop  sa nagpatrolya nga mga polis ang upat ka tawo nga naaktohang nagpabulhot  sa aso  sa ilang sigarilyo diha sa publiko sa  Barangay  Poblacion, Lungsod sa Cordova sa niaging gabii.

Si  Police  Lieutenant  Jan  Ace Elcid  Layug, officer-in-charge (OIC)  sa Cordova Police  Station nibutyag nga ang upat ilang naaktohan nga nanigarilyo diha sa sulod sa gisakyan niining PUJ hinungdan nga gidakop nila kini.

Ubos sa ordinansa sa lungsod ang masakpang manigarilyo diha sa publiko ang silot niini mao ang pagpahigayon og community service sama sa pagpanilhig ug paglimpiyo sa palibot.

Sa padayong pagpatrolya sa kapolisan sa lungsod uban sa personnel sa Department of Social Welfare and Development (DSWD) upat ka menor nga babaye ug lalaki nga naglibudsuroy sa lawom na nga kagabhion ang na-rescue.

Ang Cordova nipatuman kini og curfew alang sa mga menor gikan sa alas 10:00 sa gabii hangtud sa alas 4:00 sa kadlawon.

Sa laing bahin, walo ka tawo kinsa giingong nalambigitan sa swertres ang nasikop atol sa gipahigayong operasyon sa Criminal Investigation and Detection Group (CIDG7) sa Dakbayan sa Sugbo.

Ang mga nasikop mao sila si Jasper Toñacao, 19-anyos taga Barangay Budlaan; Rosalie Lamban,38, taga Barangay  Talamban; Carmela Tapic, 19, taga Barangay Budlaan; Marilou Taborada, 30 taga Barangay Guadalupe; Eljun Fuentes, taga Barangay Hipodromo; Sheila Mae Bacurnay; Radel Mae Bordario pulos taga Dakbayan sa Sugbo ug Gilbert Cañete, taga Calape probinsiya sa Bohol. (/BDB)(BANAT NEWS)