Mga libakera nangapriso

CEBU, Philippines – Upat ka babaye nga giingong libakera ang gidakop sa mga sakop sa Anti-Cyberime Group sa Dakbayan sa Lapu-Lapu ug Dakbayan sa Bogo.

Giila ang mga dinakpan nga sila si Gemma Marababot, 55, ug Rizza Otto, 48, pulos taga Dakbayan sa Lapu-Lapu.

Kini subay sa warrant of arrest batok sa duha human gireklamo sa laing babaye kinsang pangalan gipugngan una.

Matud ni Police Lt. Col. Honesto Lazo, deputy chief sa Regional Anti-Cybercrime Unit 7, nga tungod sa tsismis ang hinungdan nga gipasakaan og kasong libelo ang duha.

Dugang pa ni Lazo nga tungod sa pagpangdaut diha sa group chat sa usa ka social media diin ubay-ubay ang miyembro ug igong makonsiderar nga publiko.

Samtang wala usab magdahum si Marababot nga pasakaan sila og kasong libelo sanglit nahitabo kini niadto pang Nobiyembre sa nilabay nga tuig.

Matud pa nga nagkasumpaki sila sa presidente sa alumni association sa tunghaan nila sa high school ug didto nila kini nahisgutan sa group chat.

Giingong gitawag ni Marababot  ang ilang presidente nga unano tungod sa iyang height o gitas-on samtang si Otto gitawag kini niya nga nawong og kwarta.

Samtang nakapiyansa na ang duha ka babaye nga gidakop sa Dakbayan sa Bogo.

Giila ang mga dinakpan nga sila si Mary Grace Catapan, 31, taga Barangay Sudlonon, ug Jhallyn Gequillo Varga, 35, taga Barangay Gairan, pulos sakop sa maong dakbayan.

Matud pa nga nakakuha ang reklamante og screenshot sa group chat pinaagi sa insider niini ug iyang nabasahan nga ginganlan sab og bipolar ang iyang anak. (/GMR)(BANAT NEWS)