Gullas nisusi sa mga sam-ang sa Talisay
CEBU, Philippines — Gipangunayan ni Mayor Gerald Anthony “Samsam” Gullas Jr. ang pagsusi sa mga sam-ang sa Dakbayan sa Talisay aron masiguro nga luwas ug walay angay nga kabalak-an ang katawhan sa adlaw sa mga kalag ug Santos.
Kuyog si Police Major Gerard Ace Pelare ug ni Jonathan Tumulak, traffic czar sa siyudad, gilibot nila ang tulo ka pampubliko ug duha ka pribadong sam-ang kagahapong adlawa.
Maghimo nasab og executive order ang mayor aron sa pagdili sa mga hait nga hinagiban, saba nga butang ingon man ilimnong makahubog sud sa menteryo.
Gawas sa kapulisan ug mga sakop sa City of Talisay-Traffic Operation Development Authority (CT-TODA) nakig-alayon nasab sa mayor ang mga kapitan aron motampo og pwersa nga moabag pagmentinar sa kahapsay ug kalinaw nianang mga adlawa.
Gihangyo ni Gullas ang katawhan nga tumanon ang ipatumang mga lagda kay ang importanti nianang adlawa mao ang paghandum sa mga minahal sa kinabuhi nga mitaliwan na sa laing kalibutan.
Si Pelare sa iyang bahin miingon nga kadtong mga tawo nga nakainom na og ilimnong makahubog did-an sa pagsud sa mga sam-ang.
Magsugod ang deployment sa mga polis Oktubre 30 kay hinay-hinay naman ang pagdagsa sa mga tawo nga manglimpyo sa lubnganan sa ilang mga minahal sa kinabuhi. IBM (BANATNEWS)
- Latest
