75,000 ka senior citizen makadawat na sa hinabang
CEBU, Philippines – Human sa paghulat sa kapin sa duha ka bulan ang 75,000 ka senior citizen kinsa narehistro sa Siyudad sa Sugbo makadawat na sa ilang pinansiyal nga hinabang gikan sa siyudad.
Gikatakdang karong Septiyembre 21, 2019 ang paghatag sa pinansiyal nga hinabang sa mga senior citizen diin matag usa kanila makadawat og P3,000.
Kini human napasar sa konseho sa siyudad ang P2.5 bilyones nga Supplemental Budget-2 niadtong Martes diin lakip niini ang P455 milyones nga pundo alang sa pinansiyal nga hinabang sa mga senior citizen.
Si Mayor Edgardo Labella nagkanayon nga ang P3,000 nga madawat sa mga senior citizen gikan kini sa buwan sa Hulyo hangtud sa Septiyembre niining tuiga.
Ang kagamhanan sa Dakbayan sa Sugbo nakahatag na kini og P6,000 nga hinabang sa mga senior citizen gikan sa buwan sa Enero hangtud sa Hunyo karong tuiga. Sa laing bahin, gipahibawo usab ni Labella nga ang mga residente sa siyudad mahimo nang maka-avail sa Malasakit program sa national government sugod karong hinapos sa buwan.
Si Labella mapasalamaton sa Office of the Presidential Assistant for Visayas human kini nitabang og hangyo sa national government nga hatagan ang Cebu City Medical Center og allocation alang sa Malasakit program.
Sa pagkakaron, wala pay tukmang kantidad nga mahatag ngadto sa CCMC alang sa maong programa.
Ang opisyales sa CCMC nangita na og lugar sa hospital nga butangan sa ilang Malasakit Center nga posibleng ilusad karong ikatulo nga semana niining buwana. (/BDB)(BANAT NEWS)
- Latest
