Tulo ka polis ipa-rehab

CEBU, Philippines — Nakig-alayon ang Cebu City Police Office sa pribadong sektor alang sa pagpa-rehabilitate sa tulo ka operatiba sa Waterfront Police Station kinsa nagpositibo sa drug test.

Matud sa direktor sa CCPO nga si Police Colonel Gemma Vinluan nga adunay usa ka pribadong sektor ang nibolutaryo nga maoy mo-abaga sa pagpa-rehab sa tulo ka polis.

Gitataw ni Vinluan nga bisan pa man og i-rehab ang maong mga polis dili na gihapon sila makabalik sa serbisyo sanglit dismissal from service ang silot sa polis nga magpositibo sa ilegal nga drugas.

Human sa drug rehabilitation pangitaan og livelihood program ang maong mga polis aron aduna gihapon kini ikasuporta sa ilang pamilya.

Matud ni Vinluan nga pahalipay na lang kini sa mga polis sanglit maayo sila og agi dihang mga operatiba pa sila.

“120 cases ng illegal drugs ang kanilang nai-file kung kaya’t ma-dismiss man sila sa PNP parang payback na natin sa kanila na mapa-rehabilitate natin sila,” matud ni Vinluan.

Nasayran nga niadtong Agosto 5 gipahibawo sa direktor sa Police Regional Office 7, Police Brigadier General Debold Sinas, nga nagpositibo sa confirmatory drug test ang tulo ka polis.

Ang mga polis giila ni Sinas nga sila si Police Corporal John Combis, Police Corporal Kinsman Omolan ug si Police Corporal Robert Amascual.

Matud ni Vinluan nga hangtud karon nagpadayon pa ang ilang pag-drug test sa tanang units sa CCPO lakip na ang mga non-uniformed personnel (NUP) ug gani 60 porsyento na ang ilang na-drug test diin ang tulo maoy nagpositibo. (/GMR)(BANATNEWS)