Bar nga gironda di pasirad-an ni Chan
CEBU, Philippines – Dili pasirad-an ni Lapu-Lapu City Mayor Junard “Ahong” Chan ang establisamentong giingong ‘front’ sa prostitusyon nga nahimutang sa usa ka hotel diha sa Barangay Agus nga gironda sa National Bureau of Investigation.
"Lisud na og pamasanginlan ‘ta og harassment kay we are promoting our city as business friendly and investor friendly. So, kung mo issue ko og closure order dapat with enough basis," matud pa sa mayor.
Magpaabot pa ang mayor sa resulta sa gihimong imbestigasyon sa NBI bahin sa maong establisamento ayha pa siya moaksyon. Nabalaka siyang basin negatibo ang mamahimo niining epekto sa ekonomiya sa siyudad tungod kay magpanagana na unya ang mga investors.
Sa pagkakaron, bugtong himuon ni Chan mao ang pag-awhag sa Konseho sa pagpanday og ordinansa nga magmando sa tanang mga langyaw nga gustong manarbaho sa maong siyudad sa pagkuha gyud og work permits.
"I will ask the City Council next week to pass an ordinance nga e-require gyud ang tanang foreigners nga motrabaho diri sa Lapu-Lapu nga molukat gyud og working permit. Aron ta makahibalo kinsa ni sila ug unsa ilang trabaho diri," matud pang Chan.
Niadtong Biyernes sa gabii, na-rescue sa NBI ang 34 ka mga babayeng Chinese nga nag-edad gikan 20 ngadto sa 30 nga giingong biktima sa human trafficking sa upat ka mga kaparehas sab nilang babayeng mga Chinese.
Tungod kay kompleto sila sa papeles ug may mga tourist visas gi-turnover sila sa NBI ngadto sa Chinese Consular Office.(Gikan sa The Freeman/IBM)
- Latest
