Karsada sa Carbon gihawanan; Duha ka lane gamiton sa Ironman

CEBU, Philippines – Gilauman nga hapsay na unya ang Carbon Public Market human ang kagamhanan sa Dakbayan sa Sugbo nipahigayon og pagpanglimpiyo aron mahawan ang mga estraktura  nga nakababag diha sa karsada.

Si Cebu City Market Administrator Jonil Matuguina nagkanayon nga ang mga estraktura nga ilang gitangtang nahimutang sa tunga nga bahin sa ML Quezon Boulevard nga usa ka national road.

Ang mga nag-ukopar sa maong dapit ilahang gipapahawa apan nalangay ang pagpatuman tungod kay daghang meeting ang gihimo subay sa kamanduan ni Mayor Edgardo Labella ug nitamod usab sila sa ilang palisiya nga walay clearing nga mahitabo kon walay kabalhinan.

Ang mga manindahay nga nag-ukopar sa tunga nga bahin sa ML Quezon Boulevard ibalhin atbang usab kon asa sila nipwesto, patas ang paghatag og pwesto tungod kay dunay sukod nga gihimo.

Matud ni Matuguina nga adunay mga stall nga gihimong balay ug internet café diin kalapasan kini sa market code sa siyudad tungod kay ang lugar baligyaanan og prutas ug utanon aron paghatag og panginabuhian sa mga kabus.

Sa laing bahin, ang kapolisan, mga pribadong sektor ug traffic management team sa mga siyudad nagtigom karong buntaga alang sa umaabot nga Ironman 70.3 karong Agosto 11.

Si Police Lieutenant Colonel Percival Zorrila, deputy sa Regional Operations and Management Division nagkanayon nga sa inisyal nga nasabotan walay road closure atol sa maong kalihukan.

Giingong anaa ra sa usa ngadto sa duha ka lane ang ilang gamiton alang sa maong lumba gikan sa Dakbayan sa Lapu-lapu paingon sa Dakbayan sa Talisay.

Sa Cebu South Coastal Road giingong duha ra usab ka lane ang ilang giplanohang gamiton kini aron nga dili makadisturbo sa trapiko.

Samtang sa seguridad, gikatakdang 1,000 ka polis ug force multipliers ang ipakatap aron mobantay sa maong kalihukan. (Camille L. Pateres/BDB)(BANAT NEWS)