Usa patay, walo angol sa aksidente sa kadalanan
CEBU, Philippines — Usa ang patay ug upat ang angol sa disgrasya sa kadalanan sa National Highway Barangay Looc, Dakbayan sa Danao, Lunes sa kaadlawon.
Ang nakalas naila nga si Jefferson Lawas, 33, construction worker taga Poblacion, Compostela.
Samtang ang mga naangol mao sila si Gilberto Monta, 36, driver sa motor ug ang mga sakay niini nga iyang asawa Marie Cris Monta, 31, anak niini Mary Jessica Monta, ug lakip usab ang back rider sa namatay nga si Fernan Osabel, 25.
Matud pa ni Police Corporal Rommel Costan, imbestigador sa Danao City Traffic, gikan sa managlahing direksyon silang Monta ug Lawas.
Matud ni Costan, nikawat og linya ang namatay nga maoy naingnan nga nagkasungag kini ni Monta.
Gidala sa tambalanan ang mga biktima apan si Lawas nabugtoan sa kinabuhi.
Dugang pa ni Costan, base sa ilang pakighinabi sa kauban niini nga naangol, gikan sila nag-inom ug padulong na kining mopauli.
Samtang upat sab ang naangol apil na niini ang pito ka buwang mabdos ug iyang anak nga lalaki human sa panagbangga sa duha ka motor didto sa Tomonoy, Moalboal, Domingo sa hapon.
Ang mga naangol mao sila Rochelle Galvan, 28, 5-anyos nga anak nga lalaki. Ang nagmaneho sa ilang motor mao iyang bana nga si Juanito Galvan, 28, pulos taga Tigbaw, Badian.
Ang ilang nakabangga mao si Pedro Paradel, 33-anyos residente rasad sa nahitaboan. Gikan nangompra ang pamilya Galvan ug pagabot sa dapit nagkabanggaanay kini ni Paradel.
Gidala sa Badian District Hospital ang mga naangol hilabi na si Rochelle nga nagping-it sa kasakit sa iyang tiyan tungod sa iyang pagkadakdak. Hinuon si Paradel maoy miangkon sa gastos sa tambalanan.
Sa pikas bahin, sugod ugmang adlawa ipatuman sa Talisay City ang “no helmet no ride” sa mga motorsiklo agi og pagsiguro sa kaluwasan sa mga motoristang modagan sa maong siyudad.
Ang maong kamandoan gikan mismo ni Talisay City Mayor Gerald Anthony “Samsam” Gullas ug gitahasan sa pagpatuman niini ang bag-ong traffic czar sa siyudad nga si Jonathan “Joy” Tumulak. - Rose Carmel De la Cerna (BANAT NEWS)
- Latest
