Nalunoran sa cargo vessel adunay oil sheen

CEBU, Philippines – Gikatakdang mopahigayon og hiniusang imbestigasyon ang Philippine Coast Guard (PCG) Cebu Station ug Maritime Industry Authority (MARINA)-7 kabahin sa pagkalunod sa M/V Eva Mary Grace diha sa SEDC Port sa kadagatan sa Lungsod sa San Fernando niadtong Martes sa hapon.  Kagahapon sa buntag ang Coast Guard Marine Environmental Protection Unit nihimo og pakisusi sa lugar diin nalunod ang cargo vessel ug nakabantay sila og oil sheen diin gituohan nila nga gikan sa bilge pump sa maong barko.

Apan wala usab nila gisalikway ang posibilidad nga gikan kini sa fuel tank ug padayon ang gipahigayong monitoring sa maong buhatan.

Ang mga diver sa PCG nipahigayon usab og underwater inspection diin ang maong grupo walay nakitang kadaot sa vessel’s hull. Gitinguha usab unta sa grupo ang pag-locate aron masilyohan ang port fuel vent apan napakyas sila tungod sa cargo obstruction.

Matud pa sa tigpamaba sa PCG Lieutenant Junior Grade Michael John Encina nga alas 9:00 sa buntag nipahigayon og coordination meeting ang PCG tali sa MEPU, ship owner ug SEDC Port representatives diin ilang gihisgutan ang dinalian nga pagtangtang sa diesel oil sa barko, pagpahigayon og salvage operation, paghimo og marine casualty investigation, marine safety investigation, pagsusi sa medical status sa crane operator ug ubang crew. Lakip sa gituki ang preemptive action ug mga pagpangandam alang sa pagpugong sa oil spill gikan sa maong cargo vessel.

Atol sa maong tigom gihimo usab ang coordination tali sa MARINA-7 ug PCG alang sa joint investigation nga ipahigayon kalabutan sa maong insidente. (/BDB)(BANAT NEWS)