ABC na ang mohatag sa honorarium

CEBU, Philippines — Sugod karong buwana, ang buhatan na sa Association of Barangay Councils (ABC) Cebu City Chapter ang mo-proseso sa honoraria sa mga tanod, lupon tagapamayapa ug garbage loaders.

Kini human si outgoing Mayor Tomas Osmeña miisyu og memorandum nga gi-address kang ABC President Franklyn Ong niadtong Mayo 29.

Nunot niini, ang Cebu City Office for Substance Abuse Prevention (COSAP) ug Barangay Affairs Office (BAO) nga maoy gitahasan sa pagproseso sa honorarium sa naasoy nga mga trabahante sa barangay, gilauman nga mo-turn-over sa ilang records ngadto sa buhatan sa ABC.

Ang pangulo sa COSAP nga si Garry Lao miingon nga maayo kini nga kalambuan diin ang pagproseso sa honoraria gihatag og balik sa ABC.

Nasayran nga sa termino ni Osmeña ang maong tahas gihatag sa nahisgutang mga buhatan aron malikayan ang kalangay sa pagproseso.

Sigon ni Lao nga siya maoy mihatag og ideya sa outgoing administration nga i-turn over kini sa ABC atol sa ilang meeting uban sa mga office ug department heads dili pa lang dugay.

Ang mga records niini andam na alang sa turn-over sa ABC sanglit on time siya sa processing sa binuwan nga honoraria sa mga tanod nga nagkantidad og P4 mil.

Si Lao miasoy nga i-deploy niya ang iyang staff aron motabang sa ABC pag-familiarize sa procedures.

Sigon niini nga ang memo ni Osmeña dili makaapekto sa releasing sa monthly allowance sa mga tanod.

Sa laing bahin, gihangop usab ni Ong nga i-donate na unya ngadto sa mga barangay ang mga city-owned vehicles.

Gihulagway kini niya nga sakto nga lakang sa kasamtangang administrasyon ug mao sab kini matud pa ang plano sa umaabot nga administrasyon.

Apan giangkon sa konsehal nga usa sa hagit nga ilang nakita sa maong kalambuan mao ang maintenance ug fuel allocation sa barangay butang nga ila unyang tukion sa kagamhanan sa siyudad. Nanghinaut karon si Ong nga ang umaabot administrasyon mosuporta gihapon niini aron ang kabarangayan makaserbisyo og tunhay sa ilang mga konstituwente. (/DILT)(BANATNEWS)