DILG angay manginlabot sa Mambaling
CEBU, Philippines — Nihangyo si Konsehal Dave Tumulak, chairman sa Committee on Public Order and Safety sa konseho sa Siyudad sa Sugbo ngadto sa Department of Interior and Local Government nga manginlabot na sa kahimtang sa Barangay Mambaling.
Duha karon ang nilingkod nga kapitan sa barangay human ang suspendidong kapitan nga si Gines Abellana nagdumili sa pagkanaug sa katungdanan bisan nilingkod na si Konsehal Anne Marie Vestil Palomo isip acting barangay captain.
Nunot niini hangtud karon wala pa ka deklarar ang konseho sa barangay og state of calamity human naigo sa dakung sunog sa niaging adlaw ang Sitio Huyong-huyong ug Puntod sa Alaska, Mambaling.
Kini gumikan kay wala ang ubang mga konsehal kinsa matud ni Palomo mga kaalyado ni Abellana ug dili manambong sa sesyon.
Matud ni Tumulak nga ang DILG angay manginlabot na niini sanglit ang deklarasyon sa barangay usa sa pre-requisite aron ang siyudad makagamit sa calamity fund.
Gihulagway ni Tumulak nga makalolooy ang mga biktima sa sunog dungan sa pagbutyag nga ang prayoridad karon mao ang pagtabang sa mga nasunugan. (BANAT NEWS)
- Latest
