Mga branded nga sapatos ug sex materials ipadispatsar
CEBU, Philippines — Gipaabot sa Bureau of Customs (BOC) ang final disposition aron madispatsar na nila ang mga nasakmit nga undeclared nga bagahe gikan sa China.
Unang nasakmit niadtong Marso 16, 2019 ang mga gideklara nga sex and pornographic paraphernalia diin ang maong shipment niabot sa sub-port sa Mactan gikan sa China gibitbit sa usa ka pasahero nga si Coleman Timothy Phillip.
Si BOC XIP customs examiner Hevelyn Marzado kinsa nihimo og physical examination nasuta ang mga undeclared nga kagamitan sama sa usa ka box nga viagra, 18 ka vibrating spear, walo ka Mr. Real, unom ka pretty love battery operated 30 functions, 22 ka silk body lubricants ug upat ka sexy body stocking nga pakete.
Samtang niadtong Marso 26, 2019 adunay shipment nga niabot sa sub-port sa Mactan gikan gihapon sa China nga bitbit sa laing pasahero nga si Jo Neri.
Sa gipahigayong physical exam ni Marzado sa shipment nasuta ang mga undeclared nga kagamitan sama sa lima ka Chanel shoes, duha ka Christian Dior shoes, tulo ka Gucci shoes, duha ka Adidas shoes ug uban pa nga klase sa mga sapatos lakip ang mga bag, senina, jacket ug medyas nga mahalon.
Base sa social media account sa BOC niadtong Abril 15, 2019 niisyu na sila og warrant of seizure and detention nga misdeclared/undeclared ang maong mga butang ug nakalapas kini sa “Customs Modernization and Tariff Act”.
Si district collector Atty. Elvira Cruz nimando karon sa pagsakmit ug nihatag og direktiba sa Customs Enforcement and Security Service sa pagkustodiya sa mga butang ug hugot nga mosunod sa Customs Memorandum Order No. 8-84. (BANAT NEWS)
- Latest
