10 traffic enforcers positibo sa drug test
CEBU, Philippines — Napulo ka traffic enforcers sa Lungsod sa Minglanilla ang nagpositibo sa gipahigayon nga drug test sa Cebu Provincial Anti-drug Abuse Office (CPADAO).
Ang maong mga enforcers mga job order nga empleyado kini nga sakop sa Minglanilla Traffic Commission sumala sa pangulo sa CPADAO nga si Ivy Durano - Meca. Apil sila sa 38 ka personnel sa maong buhatan nga gipaubos sa drug test niadtong Abril 15.
Ang Banat News nisuway kini pagkuha sa habig sa pangulo sa mga traffic enforcers sa Minglanilla, apan sa pagsulat niining balita wala pay nakuha nga tubag.
Gawas sa mga traffic enforcers sa Minglanilla, usa usab ka empleyado sa Dakbayan sa Naga ang positibo sa initial drug test nga gihimo sa 67 ka empleyado sa city hall niadtong Abril 22.
Matud ni Meca wala pa siya nasayod kun unsay gihimo nga aksyon sa Minglanilla apan sa pagkakaron gipaabot pa lang nila ang confirmatory result sa screening.
Sa bulan sa Abril, 247 ka mga empleyado sa dili momenus lima ka mga LGUs ug ahensya sa gobiyerno ang gi-drug test sa CPADAO.
Niadtong Abril 1, 53 ka BJMP-7 personnel nga assigned sa lalawigan sa Sugbo ang gi-drug test, ug walay positibo.
Samtang ang 42 ka barangay officials sa Barangay Binaliw ug 47 sa barangay Quisol sa Dakbayan sa Danao ang gi-test usab niadtong Abril 5 ug 8, ug puros nag negatibo ang resulta sa drug test. (BANAT NEWS)
- Latest
