Housing sa sugboanon tribe tukoron na

CEBU, Philippines — Mahatagan na og katumanan ang dugay na nga gitinguha sa mga Sugboanon Tribe nga makabaton og permamente ug desente nga mga panimalay human sa gipahigayon nga pagpinirmahay  sa kadagkoan sa maong pundok uban sa langyaw ug lokal nga magpapatigayon.

Ang maong mga housing unit nga gikatakda pagatukoron sa mga luna nga nahimutang sa Barangay Ibo sa Dakbayan sa Lapu-Lapu, Barangay Paknaan sa Dakbayan sa Mandaue ug Mellineum St.  Inayawan sa Dakbayan sa Sugbo.

Ang pagpinirmahay nga gipahigayon sa niadtong miaging hapon sa  Big Hotel sa Dakbayan sa Mandaue ang gipangulohan sa pagtambong  ni Datu Reynaldo Quimada nga maoy sectorial Tribal Chieftain sa Sugbo uban sa mga sakop usab niini.

Ang pagpirma sa maong kasabutan ang gipangulohan usab ni  Sergeus Rudnikovas nga maoy director sa UAB Investicuos Statybos Pletrai,  Engineer Mohammad Saad Hassoun Alalwi nga maoy regional authorized  representative nga maoy nag-andam og gahin nga  salapi alang sa pagaugmaron nga mga housing unit.

Dugang nga miapil sa pagpirma sa maong kasabutan mao ang kaabag sa pagpatuman sa maong proyekto pinaagi usab ni Edwin Barandino nga maoy CEO ug  president sa Golden Triumph Consolidated Mining Corporation nga nagbase sa Dakbayan sa Quezon.

Si  Barandino nga magpapatigayon,  film director ug aktor  sa iyang pagpasabot miingon nga katuyoan sa ilang pagpatuman sa maong proyekto mao ang ilang pagtabang sa gitinguha nga build , build, build  projects ni Presidente Rodrigo Duterte  nga ang mao nilang pagtabang ang matagamtaman gayod sa katawhan Pilipino.

Si Datu  Quimada sa iyang bahin, mipadayag og hilabihan nga kahinangop tungod kay  ang dugay na nilang gitinguha nga makabaton ug permamente ug desente nga pinuy-anan ang nahatagan na gayod og katumanan sa higayon nga mahuman na unya ang kaugmaran sa mga housing unit nga pagatukoron sa mga luna sa tulo ka mga dapit sa Sugbo. — Romeo T. Limpangog/LPM

Crop insurance sa mga mag-uuma tungod sa El Niño

Mokabat na ngadto sa 1,192 ka mga mag-uuma ang nahatagan sa ilang crop insurance tungod sa kadaut nga nahiaguman sa ilang pananom tungod kay apektado sa huwaw gumikan sa El Niño.

P8.98 milyones na ang napagawas gikan sa gigahin nga P24 milyones   sa crop insurance.

Gawas sa paghatag sa maong crop insurance lima ka mga munisipalidad na usab ang mideklarar ug state of calamity, ug adunay laing unom ang gikatakdang mosunod diin approval nalang sa konseho ang kulang.

Kini ang gitug-an ni Ree Relen Jr sa Provincial Disaster Risk Reduction Management Office (PDRRMO).

Gipahibalo usab karon sa PDRRMO nga padayon karon ang paglipang sa mga dap-ag kon crown of thorns diha sa kadagatan diin 14 na ka mga LGU ang apektado ang ilang pagpangisda.— /LPM (BANATNEWS)