Davide ug Magpale gituboy sa Team Alagad

CEBU, Philippines — Gituboy sa Team Alagad ni Toledo City Mayor John Henry Osmeña si Bise Gobernador Agnes Magpale ug Gobernador Hilario Davide, III isip gobernador ug bise gobernador sa Probinsiya sa Sugbo sa umaabot nga eleksiyon karong buwan sa Mayo.

Si Magpale kinsa nidagan pagkagobernador ug Davide pagkabise gobernador niapil  sa proclamation rally sa Team Alagad sa kampo ni Osmeña diha sa megadome sa Barangay Sangi, Dakbayan sa Toledo kagahapon.

Ang Team Alagad usa ka political group sa mga lokal nga politiko sa Dakbayan sa Toledo nga gipangulohan ni Osmeña.

Si Osmeña nidagan kini pagkakongresista sa ikatulong distrito isip independente.

Si Magpale ug Davide parehong mapasalamaton kang Osmeña sa pag-imbitar kanila sa proclamation rally sa grupo niini.

Si Davide nibutyag nga kagahapon maoy unang higayon nga nag-uban sila ni Osmeña sa usa ka entablado atol sa usa ka rally.

Si Magpale sa iyang bahin, subling nipasigarbo sa limpiyo nga track record nila ni Davide ubos sa ilang administrasyon karon.

Matud ni Magpale nga sa duha ka piniliay nga nilabay nga siya nidagan pagkabise gobernador sa Lalawigan sa Sugbo diin nakadaog o nakakuha siya og dakong boto diha sa Dakbayan sa Toledo.

Samtang ang kandidato pagkamayor sa siyudad ubos sa Team Alagad mao si Joie Perales ug Jay Sigue pagkabise mayor. (/BDB)(BANATNEWS)