Sugbo maningil sa P96M nga revenue share sa UHRI

CEBU, Philippines — Sugdan na og paningil sa Dakbayan sa Sugbo ang Universal Hotels and Resorts Inc. (UHRI) sa walo ka tuig nga revenue share nga nikabat ngadto sa P96 milyones.

Si Francisco Fernandez, executive assistant to the mayor nagkanayon nga ang UHRI mismo ang nipahinumdum kanila nga kinahanglan na sila nga mopadala og bill aron mabayran na ang dakbayan.

Matud ni Fernandez nga sukad niadtong Agosto 2018 wala pa makadawat ang dakbayan sa binuwan nga bayranan sa UHRI.

Ang Dakbayan sa Sugbo makadawat og 10 porsyento nga bahin sa kinitaan sa UHRI sa mga moabang sa mall, sa bayranan sa parking, abangan sa hotel kon paabangan kini og lain sa UHRI o di ba kaha duha ka porsyento sa abang sa lawak ug pagkaon kon sila ra ang mo-operate sa hotel.

Apan adunay walo ka tuig nga grace period ang maong kasabotan ug kini magsugod sa ikasiyam na ka tuig gikan sa pagpirma sa agreement.

Sa walo ka tuig nga grace period kinahanglan nga mobayad ang UHRI sa dakbayan og P1 milyon matag bulan o P12 milyones matag tuig sulod sa upat ka tuig sukad sa pagtukod niini og estruktora sa Kawit Island.

Sa pagkakaron nagsugod na og pagtukod og haligi ang UHRI sa Kawit Island sa South Road Properties.

Tukoron sa UHRI ang P18 Bilyones nga integrated resort and casino sa duha ka hugna.

Ang unang hugna naglakip sa commercial or shopping center, integrated resort facility, convention center, performing arts theater, themed park ug iconic public art, one hotel, parking lot ug casino.

Alang sa ikaduhang hugna ang UHRI magtukod og duha ka hotel sa ikatulo ug ikaupat ka tuig human sa pagpirma nila sa Joint Venture Agreement. (/BDB)(BANATNEWS)