Mga tanod ug staff sa Tanke nabalaka

CEBU, Philippines — Gibati sa tumang kabalaka ang mga empleyado sa Barangay Tanke, Dakbayan sa Talisay human nga duha na ka tanod ang gipangpatay sukad sa paghingusog sa kampaniya batok ilegal nga drugas sa ilang lugar.

Si Edmund Obradas, deputy chief tanod nipadayag nga nakuyawan siya sa iyang seguridad tungod kay aktibo siya sa pagkuyog sa mga operasyon sa kapolisan.

Sa nasayran, gipatay sa wala ilhing mamumuno si Nonilito Abay, hepe sa tanod sa maong barangay niadtong niaging semana. Ang suod usab nga higala ni Abay nga usa usab ka tanod ang unang gipatay niadtong buwan sa Enero.

Ang mga staff sa Barangay Tanke kinsa nagdumili sa pagpaila nipadayag usab sa ilang kahadlok tungod sa maong mga panghitabo.

Sa laing bahin, medyo malangan ang paghuman sa extension sa Talisay City Police Station.

Kini maoy gitug-an ni Superintendent Marlu Conag, hepe sa kapolisan sa Siyudad sa Talisay.

Matud ni Conag nga ang ilang labaw  nitunol kini og budget alang sa maong proyekto. Samtang si Mayor Eduardo Gullas nihatag og P5 milyones nga budget niini. (/ BDB)(BANATNEWS)