Ermita gipaubos na sa state of calamity

CEBU, Philippines – Hingpit nang gipaubos sa state of calamity ang Barangay Ermita, Dakbayan sa Sugbo human sa dakung sunog nga miigo sa tulo ka mga sitio niini niadtong Martes sa hapon.

Gipahibawo ni acting Ermita Barangay Captain Efe Rupinta nga mipahigayon dayon sila og emergency session aron sa pagdeklarar og state of calamity sa ilang lugar.

Nunot niini, P500 mil ang ilang gamiton gikan sa ilang calamity fund, apan daku nilang hagit karon kon unsaon nila kini pagpagawas ilabi na nga wala silay Bids and Awards ug duha sila ka opisyal nga naglihok human nasuspenso ang kasagaran nilang kauban.

Matud ni Rupinta, magpadala sila og resolusyon sa buhatan sa Department of Interior and Local Government aron magpakisayod kon unsay ilang buhaton aron magamit ang maong kantidad nga ilang ihatag isip financial assistance ngadto sa mga nasunogan alang sa pagpalit usab og mga housing materials.

Gibutyag sa kapitan nga mataud-taoran pa gyud ang paggamit nila sa maong calamity fund kay daghan pang proseso ang agian.

Nasayran nga apektado sa nahitabong sunog ang Sitio Katsilaan, Pig Vendor ug Bato diin matud ni Rupinta nga posibleng mosaka pa ang gidaghanon sa naugdaw nga mga balay gikan sa 273 kay nagpadayon pa ang pag-ihap niini sa mga sakop sa Department of Social Welfare and Services.

Kasamtangang gipaabot pa sa barangay ang hingpit nga taho gikan sa kabomberohan kun unsay hinungdan sa sunog.

Si Cebu City Fire Marshall Fire Chief Inspector Noel Nelson Ababon, mitug-an nga padayon pa ang ilang pagpanguha og kasayuran bahin sa maong sunog lakip na niini ang pagpatawag sa tagbalay diin nagsugod ang pag-ulbo sa kayo.

Subay sa posibilidad nga adunay himuong re-blocking sa dapit, pabor niini si Rupinta aron mahatagan ang dapit nga nasunog og tukma nga dalan nga alang usab sa kaayohan sa mga residente.

Ang mga nasunogan ingon man si Kapitan Rupinta nangayo karon og dugang tabang sama sa mga senina, personal nga gamit, toiletries, tubig ug pagkaon.

Samtang ang mga kabataan nanghangyo og kagamitan sa pagtungha kay naapil kini sa pagkasunog.

Taliwala sa maong panawagan, nanghinaut si Rupinta nga dili masagulan og pamoltika ang paghatag og hinabang.

“Usa ra gyud akong hangyo nila ang paspas nga tabang, kanang dili siya madugay niya dili nato ipamolitika ang pagtabang kay kining tanang lumolopyo sa Brgy. Ermita kay sakop man gihapon sa Cebu City which is nagkinahanglan gyud sa ilang tabang ug usa pud kaming tanan diri botante pud sa Cebu City”, ni Rupinta pa.

Kagahapon sa buntag gibisita nila ni Vice Mayor Edgardo Labella ug kanhi mayor Michael Rama ang mga nasunugan nga kasamtang ang gipahimutang sa evacuation center duol sa dapit aron masuta ang ilang kahimtang.

Matud ni Vice Mayor Labella tumong sa pagbisita nila mao ang pagsusi sa sitwasyon ingon man pagpangayo og datos sanglit gawas sa iyang personal nga tabang ang Office of the President mopadala sab og hinabang sa mga nasunugan.

Giawhag sab ni Labella si Mayor Tomas Osmeña nga unta ipaubos sa reblocking ang lugar.

“This is more than a calamity grabe gyud kaayo, ato sad konseho I will have to talk to them and call for a special session para atong city government sad makahatag og calamity assistance”, asoy ni Labella. (Rowena D. Capistrano/DILT)(BANAT NEWS)