Pag-legalize sa habalhabal hayag na?

CEBU, Philippines – Human sa pag-uyon sa gisugyot nga House Bill 8959 o ang pagdumala sa operasyon sa motorcycle-for-hire sa ikaduhang pagbasa niadtong Enero 30, pipila ka mga opisyales sa Dakbayan sa Sugbo ang mihatag sa ilahang opinyon kalabot niini.

Si Mayor Tomas Osmeña malipayon sa maong kalambuan apan siya naghulat sa tubag sa Department of Transportation (DOTr) sa hangyo sa kongreso pagtugot sa operasyon sa habalhabal.

Siya miingon nga atol sa hearing sa Committee on Transportation, ang DOTr gipahibalo mahitungod niini. “I personally appeared before the committee and they were supportive but we are running out of time. The congressmen are requesting for DOTr to allow the operation of habalhabal,” matud sa mayor.

Si North District Representative Raul Del Mar miingon nga ang DOTr wala pa mitubag sa ilang hangyo sa pagkuha niining balita. Usa siya sa mga sponsors sa maong balaudnon uban silang Rep. Juliette Uy, Rep. Ramon Durano VI, Rep. Pedro Acharon, Jr., Rep. Rozzano Rufino Biazon, ug Rep. Arthur Yap.

Ang HB 8959, usa ka substitute bill nga nagtapok sa lima ka mga bills nga nagtugot sa mga motorsiklo isip public utility vehicles sa nasud.

Midugang si Del Mar nga ilang paningkamutan nga maaprubahan ang maong balaudnon sunod semana sa dili pa mag break sa kongreso.

“Will work to have it approved on third and final reading on the two last session days next week before adjournment for the election period,” siya miingon.

Si Konsehal Joy Pesquera miingon nga usa kini ka maayong balita. Siya uyon sa himuong regulasyon sa habalhabal kay kini mao ang usa ka alternatibo nga paagi sa transportasyon sa publiko.

Matud usab ni Konsehal Sisinio Andales nga usa kini ka maayong balita alang sa mga drayber ug sa mayor sa hingpit na unya nga pag-legalize sa operasyon sa habalhabal.

Alang sab ni Konsehal Pastor Alcover Jr., nga uyon siya sa mga regulasyon sa habalhabal samtang ang motorcycle-hailing app nga Angkas dili labot sa maong legalisasyon.

Dugang niya nga ang operasyon sa Angkas kinahanglan nga dili ilakip kay kini usa ka negosyo ug kini gikinahanglan dili mahimong legal. (/DILT)(BANAT NEWS)