Hapsay ang gipahigayung Traslacion

CEBU, Philippines — Ang direktor sa Cebu City Police Office nga si Senior Supt. Royina Garma nagkanayon nga mas hapsay ang ‘Walk with Mary’ kagahapon.

“I would consider it mas organized kami sa walk with Mary compared sa Walk with Jesus maybe because we have learned our lesson and nag-adjust din kami sa security plan and deployment,” sigun sa maong direktor.

Gipangsirad-an nila ang mga island aron dili magsulod ug gawas ang mga tawo. Gihawanan sab nila ang mga overpass nga apil sa rota sa ‘Walk with Mary.

Dugang niini nga aduna say mga mobile patrol nga mag-una sa karo aron mahawanan ang dalan, hinungdan nga sayo kini nahuman.

Matud pa nga nagpuno sila og kapin 200 ka mga polis nga gibutang sa deployment sa giagian sa ‘Walk with Mary’ diin gitambongan og gibana-bana nga 300,000 ngadto sa 400,000 ka mga deboto.

Ensaktong 5:01 sa kaadlawon naabot ang duha ka mga karo lulan sa imahe sa Birhen sa Guadalupe ug Señor Santo Niño.

Human sa Santos nga misa sa alas 7:07 sa buntag, unang gigawas ang karo sa Birhen sa Guadalupe ug gisunod ang Santo Niño nga maoy sugod sa traslacion paingun ngadto sa National Shrine of Saint Joseph didto sa Mandaue City.

Gisugat sa mga tao matag barangay ang agian sa karo og sinulog ug mga pangaliya.

Bisan sa motorkada, hugot gihapon ang seguridad gani  adunay mga sakop sa Traffic Patrol Group ug sa Security sa Basilica Minore del Santo Niño nga nagsunod sa caravan aron maoy tigpugong sa mga motorista ug uban pa nga buot mosal-ot sa motorcade.

Pag-abot sa Barangay Subangdaku sa Mandaue, City, gi-turn over ni Cebu City Mayor Tomas Osmeña ang imahe ni Senyor Santo Niño ngadto kang Mandaue City Mayor Luigi Quisumbing.

Human sa pag-insenso sa mga kaparian sa duha ka mga imahe gisulod na kini sa maong simbahan ug dayon gisugdan na ang santos nga misa dungan sa pagpahawok sa maong mga imahe.

Gani, naabot sa gawas ang linya sa mga tawo nga buot mohawuk.

Ang direktor sa Mandaue City Police Office nga si Senior Supt. Julian Entoma nagkanayon nga hapsay sab ang pagdawat sa Mandaue sa maong mga karo, gani mas sayo naabot ang mga karo.

Pagbana-bana pa ni Entoma nga miabot ngadto sa unom ka libo ka mga deboto ang nag-atang sa pag-abot sa maong mga imahe ug mitambong sa Santos nga misa.

Human sa traslacion, giingong alas dose sa tungang gabii sugdan na sab nila ang ilang security deployment alang sa paghatod sa maong mga imahe ngadto sa Dakbayan sa Lapu-Lapu alang sa fluvial parade. - /LPM (BANATNEWS)