Kabatan-onan pagiyahan sa ginikanan

CEBU, Philippines — Ang Walk with Jesus maoy mibukas sa mga kalihukan subay na sa kasaulogan sa Fiesta Señor. Gihulagway nga nagmalinawon kini kagahapon apan nakita sa mga kadagkuan sa kapolisan nga daghan pa ang angayang i-adjust subay na sa seguridad.

Sigon pa sa direktor sa Cebu City Police Office, PSSupt. Royina Garma nga atol sa Walk with Jesus, nasuta nila nga sayo pa lang, daghan nang tawo ang nangabot sa lugar.

Hinungdan nga nadesisyonan nila nga kinahanglang anaa na ang mga polis sa lugar tulo ka oras usa pa magsugod ang aktibidad.

Dugang niya nga gikinahanglan usab nga adunay mga polis nga momando sa dagan sa trapiko.

Gibana-bana sa kapolisan nga anaa sa 300 ka libo ang nitambong sa Walk with Jesus. 

Subay niini, atol sa unang adlaw sa misa-nobena alang sa kapistahan ni Senor Santo Niño kagahapon sa kadlawon, ang mga ginikanan giawhag sa rector sa Basilica Minore del Sto. Niño nga mamati ug mahimong giya sa mga kabataan. Si Fr. Pacifico Nohara Jr. nagkanayon nga subay sa kasaulogan sa Tuig sa mga Kabatan-onan, angay lamang nga sila giyahan kay daku sila og papel sa katilingban.

Kay sa umaabot, posibleng mahimo sila unyang pangulo, mananambal, mga ginikanan, ug mahimong magsasangyaw sa pulong sa Ginoo.

Sumala ni Nohara, kon ang tawo nahigugma sa Dios, dili nila pasagdan ang usag-usa ilabi na ang mga kabatan-onan. Dili lamang sa pulong apan apil na sa buhat.

Dugang sa rector nga kon adunay gugma ngadto sa Labawng Makagagahum, ang tawo magdala sa kamatuoran ug ang sayop magpabiling sayop ug dili mahimong sakto.

Pahimangno niini sa mga magtutuo nga kanunay hinungduman ang pag-alagad pinaagi kanunay sa mapaubsanon nga kinaiya.  DILT (BANAT NEWS)