Mga priso sa Naga gibalhin na sa Cebu City Jail

CEBU, Philippines — Nabalhin na niadtong Biyernes sa kadlawon ang 421 ka Persons Deprived of Liberty (PDL) o ang mga inmates sa Naga City Jail paingon sa Cebu City Jail kini sigon pa ni Konsehal Dave Tumulak, tsirman sa Committee on Public Order and Safety.

Kahinumduman nga niadtong Nobyimbre 20 si Naga City Mayor Kristine Vanessa Chiong mipadala og suwat kang Mayor Tomas Osmeña nga giagi kang Konsehal Tumulak ug mi-request nga kun mahimo ibalhin una ang dul-an 500 ka mga PDL sa Cebu City Jail butang nga giaprubahan sa mayor.

Nakalatid sa suwat ni Chiong nga gikinahanglan ang pagbalhin sa mga PDL sa ubang stabilized nga pasilidad human ang Department of Environment and Natural Resources-Mines and Geosciences Bureau (DENR-MGB) mi-isyu og “Geohazard Assessment and Investigation Report” subay na sa nahitabong landslide sa Brgy. Tinaan, Dakbayan sa Naga diin ang slope stabilization measures ipatuman sa kilid nga bahin sa Naga City Jail. Nasayran ang unang plano nga ang mga PDL sa Cebu City Jail Female Dormitory ibalhin sa bag-ong pasilidad ug ang mga PDL sa Naga City Jail ang mo-okupar sa karaan nga building.

Apan dili na kini mahinayon human ang mga PDL sa Naga City Jail adto gipahiluna sa first ug second floor sa bag-ong 4-storey building facility sa Cebu City Jail Female Dormitory.

“Gibutang lang sa sila didto sa warden kay mas safe kuno kun adto lang nila ibutang sa bag-o, ma-contain lang nila ba. As in ra sila didto”, asoy ni Tumulak.

Ang mga PDL sa Naga City Jail tulo ka buwan nga magpundo sa bag-ong building apan ang Konsehal miasoy nga kun mahuman na og trabaho ang City Jail sa Naga mobalhin ra sab sila didto. (/DILT)(BANATNEWS)