Holidays nahimong ‘Huli-days,’ 74 ka wanted nangadakpan

CEBU, Philippines — Samtang nagbakasyon ang kadaghanan tungod sa Kalag-Kalag, gigamit usab kini sa kapolisan aron pangitaon kadtong mga wanted sa mga nagkadaiyang krimen nga nalutsan og mga warrant of arrest.

Miabot ngadto sa 74 ka tawong dunay mga warrant of arrest ang nadakpan sa gipahigayong Oplan Holiday-Huliday sukad niadtong Nobiyembre 1 hangtud niadtong Nobiyembre 3, adlawng Sabado.

Samtang gipaubsan na sa Police Regional Office 7 ang alert status gikan sa full alert status ngadto sa heightened alert status kay nahuman na ang kalag-kalag.

Ang tigpamaba sa Cebu Provincial Police Office nga si Police Superintendent Janette Rafter nagkanayon nga gihimong oportunidad sa kapolisan ang kalag-kalag sa pagdakop sa mga wanted.

“Usually mao nang panahon mouli na sila gyud kay managkot,” si Rafter miingon. Sa pagpanakop pinasikad sa warrant of arrests, pito kanila ang mga most wanted sa probinsya sa Sugbo. Kasagaran niini mga kaso sa drugas ug pagpatay.

Usa na niini ang nadakpan didto sa San Isidro, Dakbayan sa Talisay nga si John Gleen Abellana, kinsang adunay kaso sa drugas. “Despite sa atong ka busy sa pagbantay sa mga menteryo, terminal, pantalan sa kadaghang tao nga nanguli sa probinsya, we also make sure nga wala nabiyaan ang regular function sa kapolisan kanang pagpanakop sa mga most wanted,” dugang sa maong tigpamaba. Sa mga sam-an sa probinsya sa Sugbo, nasakmit sa kapolisan ang mga gidili dad-on sa sud sa mga sam-ang sama sa 19 ka mga hinagiban ug 17 ka mga botelya sa ilimnong makahubog. Sugod kagahapon, gipang pull out na sa CPPO ang 360 ka mga polis nga mibantay sa mga sam-ang sa tibuok probinsya sa Sugbo. Nagpabilin na lang karon ang mga polis nga magbantay sa mga terminal ug mga pantalan ug moabag sa trapiko sanglit gipaabot nga modagsa na sa usab ang mga pasahero gikan sa probinsya. (BANAT NEWS)