Norwegian nagdala og shabu sa bar
CEBU, Philippines — Gidakop sa kapolisan ang Norwegian nga gibuwagan ug gikawatan sa iyang uyab nga Pinay human nasakping naghupot og ilegal nga drugas sa usa ka bar sa may dalan Juana Osmeña, Capitol Site, Dakbayan sa Sugbo niadtong Martes sa gabii.
Ang dinakpan giila nga si Kenneth Olsen, 30, kinsa giingong hubog atol sa pagkasikop.
Matud ni Senior Inspector Edward Sanchez, hepe sa Cebu City Police Office Station 2, nga gumikan sa kahubog naabtan sa nirespondeng polis nga giduwa-duwaan sa suspek ang duha ka pakete sa gituohang shabu sa iyang mga kamot.
Dihang gipa-medical, nasuta nga sabog gyud sa drugas ug hubog kaayo ang maong Norwegian.
“Amo gipangutana nganong nag-ingon ana siya, ingon siya gikawat daw sa iyang uyab nga Pinay iyang tanang kwarta unya gibiyaan siya,” si Sanchez niingon sa Banat News.
Dugang niini nga wala pa matino kun kinsa ang maong Pinay nga uyab sanglit wala nagpa-blotter ang langyaw.
Pasakaan og kasong paghupot og ilegal nga drugas ang maong langyaw.
Samtang laing nasikop mao si Roger Mancao alyas Timoy, 40, taga Spolarium St, Barangay Duljo Fatima.
Nasakmit gikan kang Mancao ang dili mominus 36 ka gagmay nga putos sa ginadiling drugas.
Ang mga dinakpan nagtingkagol na karon sa selda sa kapolisan samtang magpaabot nga pasakaan sa tukmang kaso. (Camille L. Pateres ug Rowena D. Capistrano/GMR)
Sikop sa Oplan Paglalansag
Nagtingkagol sa prisohan ang 47-anyos nga lalaki human kini nasikop sa gipahigayon nga pag-implementar sa search warrant sa mga sakop sa Danao City Police Station subay sa Oplan Paglalansag Omega kung kampanya batok loose firearms sa may D. Durano Street, Barangay Suba, Danao City alas 5:30 sa buntag niadtong Martes.
Ang nasikop naila nga si Rey Capitan, minyo ug residente sa maong lugar.
Hiniusa nga niimplementar sa search warrant nga giluwatan ni Judge Soliver Peras sa Regional Trial Court (RTC) Branch 10 sila si Police Supt. Melvin Montante uban sa kapolisan sa Danao City Police Station ubos sa supervision ni Police Supt. Jaime Quicho Jr.
Nasakmit gikan kang Capitan ang usa ka caliber .38 revolver Smith and Wesson nga walay serial number, usa ka caliber .45 pistol Colt, magazine sa caliber .45 ug lakip ang kagamitan sa paghimo ug pag-ayo sa armas.
Ang dinakpan gidala sa buhatan sa Criminal Investigation and Detection Group 7 ug giandam na ang pagsang-at og tukmang kaso. -/GMR (BANATNEWS)
- Latest
