Pangulo sa COSAP moapil og training sa New Zealand

CEBU, Philippines — Mobiyahe karong adlawa ngadto sa nasud sa New Zealand alang sa short term scholarship training ang pangulo sa Cebu City Office for Substance Abuse Prevention (COSAP) nga si Garry Lao.

Kini human si Mayor Tomas Osmeña nipili kaniya nga maoy ipadala alang sa ASEAN Public Sector Leadership seminar nga gipundohan sa ministry of New Zealand.

Niadtong buwan sa Septiyembre niining tuiga ang gobiyerno sa New Zealand nipadala og imbitasyon sa mayor kabahin sa training.

Ang short term training scholarships (STTS) nag-assist sa government employees pagpalambo sa ilahang kaalam ug skills nga makatabang sa pagpausawag sa ilahang trabaho.

Naila ang STTS sa pagtubag sa panginahanglanon sa human resource and development sa pagpalambo sa nasud.

Gawas niini, oportunidad usab kini sa participants nga makigbaylo og mga kasinatian ug ideya.

Tinguha usab niini ang paghatag og insights nga magamit sa mga moapil sa maong training.

Matud ni Lao nga buot siyang makahibawo pa gyud sa strategic management techniques labot sa effective implementation sa anti-drug abuse comprehensive structure o approach sa community based drug rehabilitation. Ang city government walay gasto niini sanglit “government to government” man kini nga kalihukan.

Gibutyag ni Lao nga ang training seminar mahuman sa buwan sa Disyembre.

Aron dili mabiyaan ang iyang mga gimbuhaton isip pangulo sa COSAP ang mga kalihukan  sa maong buhatan alang sunod buwan nakahan-ay na kini.

“Well gi-in place naman nato labi na sa mga activities umaabot karong November drug awareness month. Naa gihapon atong community-based program ang atong information education campaign drug test nato padayon gyud gihapon", matud ni Lao. (BANAT NEWS)