South bus terminal gihan-ay na

CEBU, Philippines – Gawas sa mga personnel sa Cebu South Bus Terminal (CSBT), kapin sa 100 ka empleyado sa Kapitolyo ang motabang pag-assist sa mga pasahero nga modagsa alang sa pagpauli sa mga lungsod sa umaabot nga kalag-kalag.

Si Jonathan “Joy” Tumulak, manager sa CSBT, nagkanayon nga usa kini sa ilang paagi alang sa hapsay nga pagpasulod sa mga pasahero sa terminal ilabi na ang pag-assist kun asa ang linya sa bus nga sakyanan padulong sa destinasyon.

Si Tumulak nagkanayon nga andam na ang CSBT sa ubay-ubay nga pasahero sunod semana diin sa Oktubre 31 maoy gipaabot nga modagsa sa terminal.

Sama sa naandan, sa luyo nga bahin sa terminal gibutangan na og lingkuranan kun asa maglinya ug magtapok ang mga pasahero una sila makasulod sa waiting lounge sulod sa terminal.

Pag-abot sa seguridad, matud ni Tumulak nga adunay mga polis gikan sa Cebu Provincial Police Office (CPPO) ang i-deploy sa sulod sa terminal nga mas doble ang gidaghanon itandi sa niaging tuig.

Samtang sa gawas sa terminal, ang mga personnel sa Cebu City Police Office (CCPO) usab ang mobantay.

Una na nga nasabotan sa kadagkuan sa CSBT uban ang pipila ka lokal nga kagamhanan sa habagatang bahin sa lalawigan nga mopadala og mga bus nga mohakot sa ilang mga residente nga mobiyahe pauli sa ilang lugar kung magnihit na ang mga bus sa terminal.

Matud ni Tumulak, 10 na ka lungsod ang nisaad nga mopadala og bus nga mag-istambay hangtud nga kinahanglanon.

Ang mga makasakay niini nga libre matud ni Tumulak mao ang mga priority passengers sama sa mabdos, tigulang, persons with disabilities (PWD) ug kadtong adunay dala nga mga masuso. (/GMR)(BANAT NEWS)