Trabahoon sa ct-toda gibahin
CEBU, Philippines — Gibahin na ang trabahoon sa City of Talisay-Traffic Operation Development Authority (CT-TODA).
Kini human nadesisyonan sa kadagkuan sa maong buhatan nga dili matabang ang trabahoon sa trapiko sa siyudad.
Si Engr. Almond Dela Peña, pangulo sa CT-TODA, nibutyag nga siya na maoy nadestino sa traffic engineering lakip na ang administrative department samtang sa operation mao si Rogelio Villaver kinsa kanhi pangulo sa Civil Security Unit (CSU).
Ang nipuli ni Villaver nga maoy mangulo sa CSU mao si Randy Kapa.
Si Dela Peña nagkanayon nga dugay na gyud kini nga giplanohan sa pagbahin sa trabaho apan karon lang kini natuman.
Iyang giangkon nga aduna gyu’y mga trabaho nga mabiyaan sama sa engineering works.
Sa ingon niini nga set-up, gilauman na nga aduna gyu’y nindot nga resulta, matud pa ni Dela Peña.
Samtang si Villaver sa iyang bahin nitataw nga daku kini nga hagit kaniya kay iyang giangkon nga ang suliran sa trapiko sa Dakbayan sa Talisay dili gyud kini tiaw. (/GMR)(BANATNEWS)
- Latest
