Drug cleared barangays langkatan og titulo?

CEBU, Philippines — Police Regional Office-7 regional director Chief Supt. Debold Sinas nahadlok nga gamiton ang drug clearing operations sa politika ilabi na nga nagsingabot ang midterm election.

Gumikan sa maong kahingawa, giimbitar ni Sinas ang regional director sa Philippine Drug Enforcement Agency Region-10 (PDEA-10) nga si Wilkins Villanueva aron mag-lecture kabahin sa barangay drug clearing operations dinhi sa rehiyon siyete.

Gipadayag ni Sinas nga bisan siya, wala makauyon sa paagi sa pagdeklarar og drug cleared barangays.

"We are against sa drug clearing operation sa barangay na hush-hush lang, minadali lalo na ngayon na election period," matud pa ni Sinas.

Nasayran nga pabor ang heneral sa gi-conceptualize ni Villanueva nga mga rekisitos sa pagdeklarar sa usa ka barangay nga drug cleared didto sa Rehiyon 10 nga gawasnon na sa ilegal nga drugas.

Karong Oktubre 3, gikatakda ang maong lecture ni Villanueva dinhi sa Sugbo alang sa tanang Chief of Police ubos sa PRO-7. Gituyo kini sa heneral aron nga ang maong mga COP na ang bahala nga mo-lecture sa ilang mga ginsakupan.

"Para masabtan nga dili ingun ana kadali ang drug clearing nga basta na lang kay ganahan lang ang barangay captain, cleared na dayon," matud pa ni Sinas.

Dako ang pagtuo sa heneral nga adunay kakuwangan sa kaalam ang mga hepe kabahin sa maong operasyon nga maoy hinungdan nganong basta-basta na lang  ang pagdeklarar sa mga politiko nga gawasnon na sa ilegal nga druga ang ilang lugar.

"We would like our COP to know that these are the requirements.

Dili lang basta gusto ng isang politician mag-declare ka na.  We have to empower our COP nga dili basta-basta mag-recommend," dugang ni Sinas.

Apan giklaro ni Sinas nga wala siyay plano nga ibalik sa uno ang mga nadeklarar na, nunot niini hayan posibleng malangkatan sila og titulo nga drug cleared. (/DILT)(BANATNEWS)