Suspek sa pagpamusil nasikop sa buy-bust

CEBU, Philippines — Nadakpan ang gitumbok nga suspek sa pagpusil-patay sa 28-anyos nga choreographer pinaagi sa buy-bust operation sa Sitio Wangyu, Mambaling, Dakbayan sa Sugbo niadtong Biyernes sa gabii.

Samtang 17-anyos nadakpan sa buy-bust operation sa Sitio Kahuyan sa samang barangay sa mao gihapon nga adlaw.

Gitumbok sa hepe sa Mambaling Police Station, Chief Inspector Randy Caballes, ang dinakpan nga si Harold Mabatid, 23, residente sa maong dapit nga maoy nipusil-patay ni Louie Flores nga taga Bato, Ermita.

“Didto niangkon siya (Mabatid) nga siyay nipusil kay nasuko siya kay two months ago nanglimpyo siya sa imburnal unya gitabonan siya sa biktima. Gikomedyahan ba,” si Caballes nagkanayon.

Giingong usa si Mabatid sa kainom sa biktima ug niuna kini og lakaw aron banhigan ang biktima.

“Dugay na daw siya naglungot-lungot pero karon pa siya nakakita og higayon,” matud ni Caballes. Sa pagsubay sa kapolisan nadiskobrehan nga usa ka pusher si Mabatid hinungdan nga ila kining gipahigayonan og buy-bust operation.

Nakuha gikan sa suspek ang 45 ka gagmay ug usa ka medium nga pakete sa gituohang shabu nga mobalor og P91,568.

Samtang sa laing buy-bust operation, nasakmit gikan sa menor de edad nga lalaki ang napulo ka gagmay’ng pakete sa gidudahang shabu ug kwarta nga P200 nga gituohang halin.

Gibana-bana nga mobalor og P5,192 ang nasakmit nga shabu.

Giingong bata-bata ang maong 17-anyos sa usa ka wholesaler sa maong dapit kinsa kasamtangan pa nga gisubay sa kapolisan. (/GMR)(BANATNEWS)