Pamilya nangaon og “kuot” nalanag
CEBU, Philippines – Walo ka miyembro sa usa ka pamilya ang nangalanag human sila nikaon og lagutmon nga gitawag nga “kuot” didto sa Barangay Union sa Lungsod sa San Francisco sa Isla sa Camotes niadtong Huwebes.
Ang pamilyang Baral gidala sa Ricardo L. Maningo Memorial Hospital human nakakaon sa maong lagutmon nga nakuha sa ilang amahan.
Ang “kuot” giingong kauban ra kini sa lagutmon nga gabe ug kinahanglan og maayo nga proseso una pa makaon.
“Naay process ni sya pag-prepare, so painiton, dukdokon unya naa silay ibutang para ma-counteract ang kining poisonous effect sa chemical. Wala ni sya kahibalo, nagtoo siya nga gabe, so he prepared it, just like gabe, giapil guro niya sa sud-an,” matud ni Dr. Rene Catan ang pangulo sa Provincial Health Office (PHO).
Nakasinati og pagsukasuka, pagkalipong ang pamilya ug ang nagrabehan mao ang amahan sa pamilya.
Human mahatagi og pasiunang pagtambal gitabok sila sa dagat ug gidala sa Cebu Provincial Hospital –Danao alang sa paghatag og mas epektibong pagtambal.
Nunot niini, si Catan nipahimangno sa publiko nga magbantay sa mga kan-on nga pagkaon ilabina kon wala makaila.
“I would advise, nga something nga dili familiar nato, ato gyud na ipangutana labi na sa mga nakahibalo sama sa mushrooms, majority sa mga mushrooms poisonous baya,” matud ni Catan.
Sa pagkakaron padayong giobserbahan ang kahimtang sa pamilyang Baral diha sa maong tambalanan. (/IBM)(BANAT NEWS)
- Latest